Shyǵarmadaǵy oıdy ashyp kórsetý – ádebı analız, oıdyń jetilmegendigin kórsetý – synı kózqaras, al oıdy ózińshe túsiný – kózqaras. Bizdiki – kózqaras.
Eresek adamdar áldene jaıly áńgimelesip otyryp kúlgen bolsa – kishkene náreste de syqylyqtap qosyla kúlgen bolar edi. Sonda olar aıtar edi: «О́ı, qulynshaq, sen ne túsinip máz boldyń?».
Bul – postmodern kózqarasy.
«Bizder «gomosapıens» kezimizden bilgir ek...
Al, men ózim, mysal úshin, alfa jyly,
ıgrek táýliginde týyppyn da...
Keıin, ıks-besinde
(omega jyly)
qaıtys bolam.
Sonym úshin keshirińder»... (T. Á.)
Osy joldardy oqyǵan oqýshy áýeli tań qalady. Ile áldeneni eske túsirýge, ilese – túsinýge tyrysady.
«Bizder «gomosapıens» kezimizden bilgir ek» – Homo Sapıens. Iаkı gomınıd. Prımat. Sanalylyq pen bilgirlik – Homo sapıens.
Alaıda aqyn «bizder» jáne «al men ózim» degen eki uǵymdy qoldanyp otyr. Bul – «bizderden» bóliný. Iаǵnı darvındik «Bizderden» ózin bólekteý. Oldývaı mádenıeti tusynda gomınıd tasty tasqa soǵyp otyrǵan sátte, men – aqyn – dúnıe syryn bilgen – ǵaryshtan kelgen qubylys edim deý.
«alfa jyly,
ıgrek táýliginde týyppyn da...
Keıin, ıks-besinde
(omega jyly)
qaıtys bolam»...
Alfa jyly
Eń áýeli keletin oı – Alfa Sentavra juldyzdar shoǵyry. Centaurus – Kentavr. Kisi keýdeli jylqy. Demek, jylqy jyly. Alaıda aqyn jylqy jylynyń tóli bolmaı shyqty.
Endi?
Alfa – barlyq álipbılerdiń birinshi hárpi. Alfa, Alef, Alıf... Mysyr ıeroglıfinen shyǵyp protosınaı álipbıine ótip, odan Fınıkııa (foınıkes) álipbıine jetken Alef – ógiz degen maǵyna beredi eken. Sıyr jyly boldy ǵoı. Biraq aqyn sıyr jyly da týmaǵan eken.
Sonda?
Álde munyń syry darvınızmnen bas tartýynda jatyr ma? Ejelgi jazbalarda, keıingi dinı kitaptarda Alfa jáne Omega – birinshi jáne sońǵy árip – áýel men aqyr degen maǵyna berýshi edi ǵoı. «Men Alfa jáne Omega, báriniń bastaýy jáne sońy». Aqyn rýhy áýel basta, sóz jaralǵan on segiz myń ǵaryshta týǵan. Biraq bul – abstraksııa ǵoı.
Eń ejelgi árip bizdi osynsha áýrege saldy. Sońyna deıin áýreleneıik.
Kabbalada bul áriptiń Eın-Sof degen maǵynasy bar eken. Eın-Sof – sheksiz, kirshiksiz Táńirııa.
Kádimgi ózimiz qoldanyp júrgen A – kókke umtylǵan qarama-qaıshylyqtardyń birligi. Jaratýshyǵa umtylý. Bul – pıramıda, kıiz úı, qos, mazar.
«Juldyzdanǵan Aspandy da (barlyǵynan joǵary), jumyr baspen dar-r etkizip jyrtyp shyǵam men áli!» (T.Á.)
Endi «A» árpiniń jazbasha kishi túri «a» – oralǵan jylan. Aqynnyń bir óleńinde «ıirilip, jıyrylyp óz ishime tyǵylam» deýiniń de syry osynda turǵandaı. Aqyn jylan jyly týǵan. Onyń kýlti – Mar. Alfa – Alef – A – a.
Igrek táýligi
Ejelgi álipbılerde áripterdiń ret sany kádimgi esep sanymen sáıkesip otyratynyn baıqaımyz. Sol sebepti de sandy árippen, áripti sanmen tańbalaý úrdisi qalyptasqan.
Igrek – latyn álipbıinde 25-inshi árip. Aqyn aıdyń 25-inshi táýliginde týǵan deý ábden qısyndy. Alaıda aqynnyń týǵan kúni aıdyń 20-synshy táýligi ekenin bildik.
Sonda qalaı?
Ú – tańbasy latyn álipbıinde ıgrek dep oqylsa, grek álipbıinde ıpsılon dep oqylady. Al ıpsılon grek álipbıinde reti boıynsha jıyrmasynshy árip.
Munyń jumbaǵy sheshildi:
Tynyshtyqbek Ábdikákimuly – 1953 (jylan jyly) jyldyń 20 maýsymynda ómirge kelgen.
Iks-besin jáne Omega
Adamnyń ómirge kelýi men ómirden ótýi – Jaratýshynyń ǵaıyby. Ǵaıyp – pende sanasynyń baspaldaǵy barmaıtyn álem. Sondyqtan biz ıks-besinniń sandyq-sıfrlyq mánine emes, pálsafalyq qasıetti mánine qatysty oılanaıyq.
H – latyn álipbıindegi Iks, grek álipbıindegi Hı, eski slavıan álipbıindegi Her, arab jáne kırıllısadaǵy Ha. Biraq munyń bári bizge qorek bola almaıdy.
Bizge ıvrıt tilindegi H – Het kerek.
Het – olardyń tanymynda qashý (júgirý) jáne qaıta oralý degen mánge ıe. Iаǵnı ómir aınalymy. Sımvolıkada – kópir degen maǵyna beredi. Aspan men jer arasyndaǵy kópir. Kópir – Jaratýshy men ǵalamnyń, ǵalam men adamnyń birligi. Sol kópir arqyly Adam balasy óz Iesine barady.
Omega – birdiń sońy, ekiniń basy.