Túrkııanyń TRT-1 memlekettik telearnasy elordany Anadoly jurtyna tanystyrý maqsatymen Nur-Sultan qalasy týraly arnaıy baǵdarlama daıyndap, kórermenge usyndy. Ár bólimi álemniń bir qalasyn tanystyratyn «Qalama qosh keldińiz!» atty baǵdarlamanyń «Nur-Sultan» dep atalatyn 2-bólimi 26 jeltoqsanda kórsetildi.
Baǵdarlamanyń maqsaty kórermenderge álem memleketteriniń iri qalalarynyń tanymal týrıstik oryndaryn tanystyrý bolyp tabylady. Osy oraıda arnanyń túsirilim toby qyrkúıek aıynda Nur-Sultanǵa arnaıy kelgen bolatyn. Bir apta boıy elordanyń kórikti oryndarynyń tarıhyn baıandaı otyryp, túsirgen edi. Bul joba TRT-1 memlekettik telearnasy men Iýnýs Emre ınstıtýty arasynda qol qoıylǵan yntymaqtastyq aıasynda júzege asyryldy.
Baǵdarlamanyń basqa bólimderi Amsterdam, Vena, Mostar, Varshava, Býdapesht, Rım, Parıj, Doha, sondaı-aq Máskeý syndy álemniń úlken qalalaryna arnalǵan. «Qalamyzǵa qosh keldińizdiń» alǵashqy bóliminde Saraevo, al ekinshi bóliminde Nur-Sultan qalasy kórsetildi. Baǵdarlamada «Báıterek» monýmenti, Beıbitshilik jáne kelisim saraıy, «Nurjol» býlvary, «Han Shatyr» oıyn-saýyq jáne saýda ortalyǵy, Qazaqstan ulttyq mýzeıi, Qoljazbalar jáne sırek kitaptar ulttyq ortalyǵy, Áziret Sultan meshiti, AILAND otbasylyq demalys saıabaǵy, «Atyraý» kópiri, EKSPO-2017 kesheni, «Nur Álem» mýzeıi men Qazaq eli monýmenti sııaqty elordanyń eń tanymal oryndary tanystyryldy.
Nur-Sultandaǵy Iýnýs Emre ınstıtýtynyń eki oqýshysy baǵdarlamanyń konsepsııasyna sáıkes elordany kórermenge túrikshe tanystyrdy. Sondaı-aq júrgizýshiler qazaq ulttyq taǵamdarynyń dámin tatyp, et, baýyrsaq pen qymyz, sondaı-aq dástúrli sadaq atý óneri jaıly málimet berdi.