Týǵan jerdiń topyraǵy

Qazaqstannyń eńbek sińir­gen óner qaıratkeri, belgili sýret­shi Áý­bákir Ysmaıylov «Tyń ıgerý. Ereı­­­mentaý qıyrla­ry» shyǵar­ma­sy arqyly tumsa tabıǵatymyz keńes­tik ıdeo­logııanyń qurbany bolǵa­nyn kórsetkisi kelgendeı. Qarańyzshy, tyń ıgerilgen oblystarda 700 qazaq mektebi jabylyp, balalar mektep-ınternattarda orys tilinde bilim aldy. Olar tek to­pyraqty ǵana emes, qazaqtyń sa­nasyn ýlady.

Jalpy, Áýbákir Ysmaıylov beıneleý ónerine 30-jyldary kelgen býyn ókili. Onyń shy­ǵar­mashylyq ǵumyry Qazaq­stan­daǵy beıneleý óneriniń bastalý jáne qalyptasý tarıhymen tyǵyz baılanysty. Bizge «Han Táńiri», «Bartoǵaı», «Jýaly ja­zyq­tarynda», «Bes shatyr» syndy ǵajaıyp romantıkalyq peızajdary bar kóptegen kórkem dúnıe syılady. Onyń týyndylary – qashanda beıneleý masshtabymen, boıaýlarynyń ashyqtyǵymen, mýzykalyq áýendiligimen, ekpindi yrǵaǵymen, tańdanys shattyǵymen arbap alatyn kórinisterge toly.

«Tyń ıgerý. Ereımentaý qı­yr­lary» kartınasy panora­malyq peızaj janryna jatady. Sýretshi Ereımentaý je­riniń kórinisterin beınelegeni sonshalyq, kórermen taý jaqtan óziniń aldynan ashylǵan kó­ri­niske qarap turǵandaı áserde bo­lady.

Qylqalam sheberi nazaryn kún batqan kezdegi atyrapqa aýdarǵan. Kartınanyń aldyńǵy bóliginde jel tegistegen taý jotalary beı­nelengen. Atyrap birte-birte tómendeı beredi de, bizdiń aldymyzdan elik tabyny jaıylyp júrgen alasa tóbeler shyǵady. О́zen buralańdap baryp batqan kúnniń shuǵylasy túsip turǵan kólge quıýda. Tumsa tabıǵatty trak­torlar jyrtqan egistik pen tyń ıgerýshilerdiń vagondary buzyp tur. Sýretshi kóldiń janyna adamdardyń sulbasyn qosqan. Olar qosalqy mánge ıe.

Avtor jasyl tústiń ártúrli reńkin qoldana otyryp, bultty jaryp shyqqan jaryqtyń shóp túsin qalaı ózgeretinin kórsetken. Kún kókjıekke asylǵan qalpy tóbelerdiń baýraıyn qyzyl tús­ke, al bulttardy aqshyl qyzylǵa, sa­ryǵa, tipti qyzǵylt túske boıaıdy. Qor­shaǵan orta jumbaq ári tylsym ásemdikke baılanyp qalǵandaı.