Shet aýdanyndaǵy Kıikti aýylynda jańa mektep salý týraly áńgime osydan on bes jyldaı ýaqyt buryn kóterilgen edi. Mundaǵy alpys jyl buryn qabyrǵasy qalanǵan bilim uıasynyń ǵımaraty ábden tozyp, ishi oqýshy balalarǵa tarlyq etip, bul ózekti másele kúni keshege deıin kún taqyrybynda ótkir turǵan bolatyn.
Endi mine, Bilim jáne ǵylym mınıstri Ashat Aımaǵambetov pen Qaraǵandy oblysynyń ákimi Jeńis Qasymbektiń qoldaýymen atalǵan aýylda qysqa merzim ishinde eki qabatty zamanaýı mektep úıi boı kóterdi, dep jazady Egemen.kz.
Jańa jyl aldyndaǵy jańa mekteptiń ashylýyna oblys ákiminiń orynbasary Abzal Núkenov, oblystyq bilim basqarmasynyń basshysy Gúlsim Qojahmetova, Shet aýdanynyń ákimi Muhıt Muhtarov, aýdandyq máslıhattyń hatshysy Báken Tóleýqulov jáne aýdandyq bilim bóliminiń basshysy Eldos Smaǵulov arnaıy keldi.
Sáýleti sulý jáne sapaly salynǵan jańa mektep eki bloktan turady. Ishi tolyqtaı zamanaýı materıaldyq-tehnıkalyq bazamen jabdyqtalǵan. Atap aıtqanda, bilim uıasynda 17 oqý kabıneti, lıngafondyq-mýltımedııalyq kabınet, sheberhanalar, sport zaly, kitaphana, ashana, medısınalyq bólme qarastyrylǵan. Sonymen qatar, mektepaldy daıarlyq synyby úshin 15 balaǵa arnalǵan jeke kireberis jabdyqtalǵan. Olardyń jeke oıyn jáne oqý bólmeleri bar.
Jańa mekteptiń ashylý saltanatynda quttyqtaý sóz sóılegen Abzal Núkenov Qaraǵandy oblysynyń ákimi Jeńis Qasymbektiń atynan bilim mekemesine 10 mıllıon teńgeniń sertıfıkatyn tabys etti.
– Jańa mekteptiń salynyp, paıdalanýǵa berilgenine óte qýanyshtymyz. Muny biz el Táýelsizdiginiń 30 jyldyq mereıtoıy aıasynda aýylymyzǵa jasalǵan tolaıym tartý dep qabyldadyq. Kıikti aýylynyń mektebi buryn da óziniń ıgi dástúrimen, joǵary jetistikterimen dańqy shyqqan bilim uıasy edi. Endi bul sabaqtastyq jalǵasyn sátimen taýyp, jańa mektep qabyrǵasynan elimizge adal qyzmet etetin bilimdi jáne ónegeli túlekter samǵap usha bersin degen tilek aıtamyz, – dedi tusaýkeser rásiminde sóz sóılegen ardager ustaz Jibek Esjanova.
Kıikti aýylynyń turǵyndary mektep úıin 670 mln teńge qarajatqa sapaly dárejede salǵan Qyzylorda qalasynyń «Aman qurylys» kompanııasyna, onyń basshysy Ádilhan Mashtaev myrzaǵa dán rıza. Qurysh qoldy qurylysshylardyń eren eńbegin, merdigerdiń aıaqasty týyndaǵan keıbir qıynshylyqtarǵa qaramastan qurylysty josparlanǵan ýaqytta bitirgen jaýapkershiligi men iskerligin oblys basshylyǵy da atap ótti.
Osy oraıda, Shet aýdany boıynsha 2021 jyly jalpy somasy 320 mıllıon teńge bolatyn qarajatqa 21 mekteptiń tereze, shatyr, jylý júıelerijańartylyp jáne syrtyn tystaý jumystary júrgizilgenin aıta ketken jón. Sonymen qatar,Aqadyr kentindegi ótken ǵasyrdyń 40-shy jyldary salynǵan, sport zaly múldem bolmaǵan Álimhan Ermekov attyndaǵy mektep-resýrs ortalyǵynda 390 mıllıon teńgege jańadan sport zal men ashana qurylysy bastalǵan.
Bolat joldyń boıyndaǵy Kıikti aýylynda búginde myńnan astam adam turady. Aýyl turǵyndarynyń basym bóligi temir jol salasynda eńbek etedi. Al mektep jasyndaǵy balalardyń sany 179 oqýshyny quraıdy. Olarǵa bilim jáne tálim-tárbıe berýmen 35 pedagog-mamannan turatyn ujym aınalysady.
Bul aýylda qazaqtyń klassık kompozıtory, KSRO Memlekettik syılyǵynyń laýreaty Sydyq Muhamedjanov dúnıege kelgen. Qazirgi tańda mektep áıgili sazgerdiń esimimen atalady. Sonymen birge Kıiktiniń kıeli topyraǵyna qazaqtyń kórnekti jazýshy, «Elim-aı» trılogııasynyń avtory Sofy Smataevtyń da kindik qany tamǵan.
Sátin salsa, Kıikti aýylynyń oqýshylary úshinshi toqsanda barlyq sanıtarlyq normalar men talaptardy saqtaı otyryp, shtattyq rejimde ishi-syrty syńǵyrlaǵan sý jańa mektepte oqıtyn bolady.