Premer-Mınıstr orynbasarynyń m. a. Eraly Toǵjanovtyń tóraǵalyǵymen el aýmaǵynda koronavırýs ınfeksııasynyń taralýyna jol bermeý jónindegi vedomstvoaralyq komıssııanyń otyrysy ótti. Bul týraly Premer-Mınıstrdiń saıty habarlady.
Otyrysqa memlekettik jáne jergilikti atqarýshy organdardyń ókilderi qatysty.
QR Densaýlyq saqtaý mınıstriniń mindetin atqarýshy Jandos Búrkitbaev Qazaqstandaǵy epıdemıologııalyq ahýal týraly baıandady.
Koronavırýs ınfeksııasyna qatysty jaǵdaı nasharlap barady, jyl basynan beri KVI+ 5093 jaǵdaıy jáne KVI- 115 faktisi tirkeldi. Sońǵy táýlikte KVI+ juqtyrýdyń 1510 jaǵdaıy anyqtaldy, — dedi mınıstrdiń m. a.
Sonymen qatar epıdemıologııalyq jaǵdaıdy baǵalaý matrısasyna sáıkes, Nur-Sultan qalasy «qyzyl» aımaqqa ótti.
Shymkent jáne Almaty qalalary «sary» aımaqta tur. Qalǵan 14 óńir «jasyl» aımaqta ornalasqan. Jalpy Qazaqstan Respýblıkasy – «sary» aımaqta.
Sondaı-aq vırýstyń reprodýktıvti sany ósýde. Búginde elimiz boıynsha ol 1,5-ti quraıdy, al 5 óńirde 2-den joǵary, tap aıtsaq, Nur-Sultan qalasy, Aqtóbe, Qyzylorda, Mańǵystaý jáne Túrkistan oblystary.
Epıdemıologııalyq jaǵdaıdyń nasharlaýy jaqynda anyqtalǵan koronavırýstyń «Omıkron» shtamynyń taralýyna, mereke kúnderi halyqtyń ishki mıgrasııasynyń joǵary bolýyna, profılaktıka sharalaryn jetkilikti saqtamaýyna tikeleı baılanysty. Bıylǵy 6 qańtar kúni elimizdiń óńirlerinen 2021 jylǵy jeltoqsannyń úshinshi onkúndiginde alynǵan, vırýstyń oń belgileri bar 96 úlgini tolyq genomdyq sekvenırleý jumystary aıaqtaldy. Sonyń nátıjesinde búgingi tańda 8 úlgiden (8,3%) vırýstyń «Omıkron» nusqasy anyqtaldy, onyń 7-eýi Almaty qalasynda jáne 1-eýi Nur-Sultan qalasynda tirkeldi.
Sondaı-aq elimizde áli de «Delta» shtamy basym – 71%, al 16%-y «Delta plıýs», 4,7% koronavırýs shtamynyń basqa da nusqalary anyqtalǵan.
Baıandamany tyńdaǵan Eraly Toǵjanov basty mindet epıdemıologııalyq jaǵdaıdyń nasharlaýyna jol bermeý ekenin atap ótti.
Sonymen qatar Densaýlyq saqtaý mınıstrligine 2 kún ishinde tósek-oryn, dári-dármek, turaqtandyrý qorlarynyń daıyndyǵyna jáne epıdemıologııalyq jaǵdaı nasharlap ketken jaǵdaıda ár óńirdiń densaýlyq saqtaý júıesiniń daıyn bolýyna taldaý júrgizý tapsyryldy.
Otyrys qorytyndysy boıynsha vıse-premerdiń m. a. jergilikti atqarýshy organdarǵa turaqty negizde myna jumystardy oryndaýdy tapsyrdy:
- fıltr-kabınetterdiń jumysyn kúsheıtý, qajet bolǵan jaǵdaıda qosymsha kabınetterdi ashý;
- JMKK uıymdaryna naýqastar kóp túsken jaǵdaıda pasıentter aǵynyn retteýdi erekshe baqylaýǵa alý;
- qońyraý shalý ortalyqtarynyń jumysyn jandandyrý;
- sıtýasııalyq ortalyqtardyń jumys isteýin qamtamasyz etý;
- mobıldik brıgadalardyń qajetti medısınalyq jabdyqpen jaraqtandyrylýyn qamtamasyz etý;
- mobıldi brıgadalar rezervin daıyndaý; - úıde emdelip jatqan naýqastardy baqylaý jumysyn kúsheıtý;
- qashyqtan kórsetiletin medısınalyq qyzmetterdi belsendi túrde qoldaný;
- pasıentterge dıagnoz qoıý men emdeýdiń klınıkalyq hattamalaryna sáıkes qaraý.
Buǵan qosa Densaýlyq saqtaý mınıstrligine ár óńirdiń epıdemıologııalyq ahýalyna turaqty negizde monıtorıng jasaý, qajet bolǵan jaǵdaıda koronavırýstyń jańa shtamymen kúres boıynsha óńirlerdiń densaýlyq saqtaý júıeleriniń qyzmetin uıymdastyrý boıynsha konsýltatıvtik, metodologııalyq jáne praktıkalyq kómekpen qamtamasyz etý, «Atameken» UKP, óńirlerdiń ákimdikteri jáne basqa da múddeli memlekettik organdarmen jáne uıymdarmen birlesip, qajet bolsa karantındik sharalardy kúsheıtý boıynsha kelisilgen usynystar engizý tapsyryldy.
Otyrysty qorytyndylaı kele, E. Toǵjanov epıdemıologııalyq jaǵdaı boljamy halyqtyń vaksınalaýmen jáne revaksınasııamen qamtylý kólemine tikeleı baılanysty bolatynyn, sondaı-aq óńirlerdiń ákimdikteri bul baǵyttaǵy jumysty kúsheıtýi tıis ekenin aıtty.