Prezıdent Qasym-Jomart Toqaevtyń tóraǵalyǵymen shuǵyl áreket etý shtabynyń kezekti otyrysy beınebaılanys rejıminde ótti, dep habarlaıdy Egemen.kz.
Jıyn barysynda Bas prokýror, Ulttyq qaýipsizdik komıtetiniń tóraǵasy, Ishki ister jáne Qorǵanys mınıstrleriniń mindetin atqarýshy tulǵalar baıandama jasady.
Memleket basshysyna quqyq qorǵaý organdary men Qarýly Kúshterdiń elimizdegi jaǵdaıdy turaqtandyrý úshin qabyldaǵan belsendi sharalary týraly baıandaldy. Adamdar men kólikterdi tekserý, sondaı-aq strategııalyq nysandarǵa baqylaý ornatýdy júzege asyrý maqsatymen eldi mekenderdiń aýmaǵyna 93 blokbeket qoıyldy.
Qasym-Jomart Toqaevqa zań talaptaryna baǵynbaý jáne asa mańyzdy ári strategııalyq nysandarǵa shabýyl jasaý faktileriniń qatań túrde joly kesilgeni jóninde málimet berildi. Almatyda «Barlyq» jáne «Altyn Orda» bazarlaryn tazartý barysynda 207 adam ustaldy. Olardan urlanǵan 5 avtokólik, qarý-jaraq, oq-dáriler, qalqandar tárkilendi.
Elordada aldyn alý sharalary júrgizilýde. Onyń barysynda aýlalar men páterlerdiń tynyshtyǵy qamtamasyz etiledi, sondaı-aq táýlik boıy avtopatrýl kúzetedi. Jalpy elimiz boıynsha tótenshe jaǵdaı rejımin buzǵan 1,5 myń adam jaýapqa tartyldy.
Memleket basshysyna negizgi kúsh-jigerdiń qazirgi ýaqytta terrorısterdiń mekenjaıyn anyqtap, ustaý jónindegi shuǵyl sharalarǵa baǵyttalyp otyrǵany baıandaldy.
Qasym-Jomart Toqaev elimizdegi qoǵamdyq tártip pen qaýipsizdikti qalpyna keltirý isin jalǵastyra berýdi, sondaı-aq atalǵan jumystar boıynsha aqparattyq qoldaý kórsetýdi kúsheıtýge tapsyrma berdi.