Ujymdyq Qaýipsizdik Keńesiniń sheshimine sáıkes Qazaqstan Respýblıkasynda sany 2030 adam jáne 250 birlik tehnıka UQShU Ujymdyq bitimgershilik kúshteri óristetilip, qoıylǵan mindetterdi oryndaýǵa kiristi. Bul týraly Memleket basshysy Qasym-Jomart Toqaev UQShU Ujymdyq Qaýipsizdik Keńesiniń kezekten tys sessııasynda habarlady, dep jazady Egemen.kz.
«Qazaqstandaǵy oqıǵalar synı sıpatqa ıe boldy. Almaty men toǵyz oblys ortalyǵy lańkesterdiń qolynda boldy. Biz terrorızmge qarsy operasııa rejımin jarııaladyq. Qazaqstan UQShU-ǵa kómek úshin júgindi. Elordaǵa úsh áskerı-kólik ushaǵynyń kelgenin bilgen sodyrlar prezıdenttik rezıdensııany basyp alý josparynan bas tartty. Bul bizge Almatyǵa qosymsha kúsh jiberýge jáne qalany terrorısterden aryltýǵa múmkindik berdi», dedi Memleket basshysy.
Onyń aıtýynsha, búgingi tańda Ujymdyq Qaýipsizdik Keńesiniń sheshimine sáıkes Qazaqstan Respýblıkasynda UQShU-nyń Ujymdyq bitimgershilik kúshteri 2030 adam men 250 birlik tehnıkany ornalastyryp, qoıylǵan mindetterdi oryndaýǵa kiristi.
«Olar áýejaılardy, áskerı qoımalardy jáne basqa da strategııalyq nysandardy jabý jáne qaýipsizdigin qamtamasyz etý fýnksııalaryn júzege asyrady. Sál keıinirek UQShU Bas hatshysynyń iske asyrylyp jatqan mindetter týraly baıandamasyn tyńdaımyz», dedi Qasym-Jomart Toqaev.