Nur-Sultan qalasynyń ákimi Altaı Kólginov óziniń Instagram paraqshasynda qala turǵyndaryn tótenshe jaǵdaı rejıminiń barlyq erejelerin saqtaýǵa jáne senimdi derekkózderde jarııalanǵan aqparattarǵa ǵana senýge shaqyrdy, dep habarlaıdy Egemen.kz qala ákimdiginiń resmı saıtyna silteme jasap.
«Qurmetti qala turǵyndary! Qalamyzda jaǵdaı turaqty. Degenmen, quqyq qorǵaý organdarynyń bári jumysyn kúsheıtilgen rejımde jalǵastyrýda. Elordanyń perımetri boıynsha blokposttar ornatyldy, sol sııaqty polısııa qyzmetkerleri aýlalardy jáne páterlerdi aralaıdy.
О́zderińiz biletindeı, qalamyzǵa saǵat 23:00-den 7:00-ge deıin komendanttyq saǵat engizildi. Polısııa qalany kúzetedi. Bul ýaqytta turǵyndardyń syrtqa shyǵýyna tyıym salynady.
Qala turǵyndaryn ózderi men jaqyndarynyń qaýipsizdigi úshin TJ rejıminiń barlyq erejesin saqtaýǵa, adam kóp jınalatyn oryndarǵa barmaýǵa, destrýktıvti kúshterdiń arandatýyna ermeýge, tek resmı aqparat kózderine senýge shaqyramyn», dep jazdy qala ákimi.