Almaty qalasyndaǵy terrorıstik shabýylǵa toıtarys kezinde Ulttyq qaýipsizdik komıteti Shekara qyzmeti akademııasynyń 2-kýrs kýrsanty Dáýlet Juparbekov erlikpen qaza tapty. Otan aldyndaǵy boryshyna adal bolyp, el tutastyǵyn saqtaý jolynda erlikpen qaza tapqan jas ulannyń denesi óziniń týǵan jeri – Túrkistan oblysy, Saryaǵash aýdanyna jetkizilip, Túrkistan jurtshylyǵy ony aqtyq saparǵa shyǵaryp saldy.
Prezıdent Qasym-Jomart Toqaevtyń Jarlyǵymen Dáýlet Baýyrjanulyna III dárejeli «Aıbyn» ordeni berilgen bolatyn. Qaraly jıynda Halyq qaharmany Baqytjan Ertaev bul qaıǵy bir ǵana otbasy emes, halyqtyń qaıǵysy ekenin jetkizdi. Al Saryaǵash aýdanynyń ákimi Muhıt Otarshıev pen el aǵalary, áskerı sala basshylary men ókilderi, jergilikti turǵyndar marqumnyń otbasyna kóńil aıtty.
«Dáýlet – óz eliniń naǵyz patrıoty, antyna adal, joldastary arasynda syıly, eline áli bereri kóp, bolashaǵynan úlken úmit kúttiretin azamat edi. Orny tolmas aýyr qaıǵylaryńyzǵa ortaqtasyp, shyn júrekten kóńil aıtamyn. Batyr uldyń jarqyn beınesi aýdan halqynyń, aǵaıyn-týys, dos-jaran, áriptesteriniń júreginde máńgi saqtalary sózsiz», dedi aýdan ákimi.
Dáýlet Juparbekov 2002 jyly 1 jeltoqsanda Saryaǵash qalasynda dúnıege kelgen. Tolybaı batyr atyndaǵy jalpy orta mektebin bitirip, Almaty qalasyndaǵy Ulttyq qaýipsizdik komıteti Shekara qyzmeti akademııasyna oqýǵa túsken bolatyn. Otbasyndaǵy ekinshi perzent. Marqumnyń sońynda arda azamattan qapııada kóz jazyp qalǵan ata-anasy, ápkesi jáne eki inisi qaldy.
Túrkistan oblysy