Prezıdent Parlament Májilisiniń jalpy otyrysynda muǵalim tapshy óńirlerdiń máselesin sheshýdiń jańa tásilin usyndy. Osy usynys qazaqstandyq pedagogıkalyq qaýymdastyqtyń kóńilinen shyqty.
Sońǵy jyldary elimizdiń orta bilim berý salasynda eleýli reformalar qolǵa alynyp, bul júıeli túrde iske asýda. Olardyń ishinde baǵalaý júıesi, bilim berý baǵdarlamasy, pedagogıkalyq tásilder jańartyldy. Sonymen qatar ınklıýzıvti bilim berýdiń jańa saıasaty qoldanysqa engizildi. Al «Pedagog mártebesi týraly» Zań muǵalim mamandyǵynyń qoǵamdaǵy bedeliniń artýyna jáne olardyń eńbekaqysynyń ósýine edáýir yqpal etkenin bilemiz.
Osy úrdisterdiń jalǵasy retinde Memleket basshysy muǵalimder jetispeıtin óńirler úshin tıisti qoldaý sharalary kesheni men aımaqtarǵa úzdik muǵalimderdi tartý boıynsha arnaıy baǵdarlama ázirleýdi tapsyrdy. Atalǵan baǵdarlama pedagogıkalyq bilim berýge jańa betburys jasaıtynyna kámil senimdimiz. Adamı kapıtaldyń sapasyn arttyrý – qoǵam damýyn qamtamasyz etýdiń basty tetigi. Al qoǵamnyń zııatkerlik áleýetin ilgeriletýdi júzege asyrý pedagogterge tikeleı baılanysty.
Otandyq pedagogıkalyq joǵary oqý oryndary biliktiligi joǵary muǵalimderdi daıarlaýdy odan ármen jańa deńgeıge kótere túsý qajet dep oılaımyn. Bul turǵyda bolashaq mamandardyń sapasyna jete mán bergen durys. Qazaq ulttyq qyzdar pedagogıkalyq ýnıversıteti – sapaly pedagogıkalyq bilim berýdi basty maqsat etip kele jatqan oqý orny. Ýnıversıtet ujymy Memleket basshysy atap ótken mindetterdi saralap, tyń oılary men ıdeıalaryn júzege asyrýǵa nıetti. Bul tarapta arnaıy keshendi josparlar da qabyldanady. Bul sharalar Prezıdent usynǵan baǵdarlamanyń sátti júzege asýyna, elimizdegi muǵalim tapshylyǵyn joıýǵa ózindik yqpalyn tıgizetini sózsiz.
Gúlmıra QANAI,
Qazaq ulttyq qyzdar pedagogıkalyq ýnıversıtetiniń rektory
ALMATY