QR Qarjy mınıstrligi Prezıdenttiń tapsyrmalaryn dereý oryndaý úshin qabyldanyp jatqan sharalar týraly aıtty, dep habarlaıdy Egemen.kz QR QM baspasóz qyzmetine silteme jasap.
Vedomstvoda habarlaǵandaı, memlekettik qoldaýdyń qosymsha sharalary arqyly júktemeni óteı otyryp, taý-ken metallýrgııa kesheniniń jer qoınaýyn paıdalanýshylardan túsetin túsimderdi arttyrý tetikteri ázirlenýde.
Jalpy, keden salasyndaǵy buzýshylyqtar úshin jaýapkershilikti qatańdatý jóninde sharalar qabyldanatyn bolady.
Kapıtaldy elden negizsiz shyǵarý bóliginde zańnamaǵa kelesi túzetýler pysyqtalýda:
1) dıvıdendterge, onyń ishinde Qazaqstan Respýblıkasyndaǵy kózderden rezıdent emesterge tólenetin jeńildikterge salyq salý kezinde jeńildikterdi qaıta qaraý;
2) úlestes sheteldikterden alynǵan «materıaldyq emes» qyzmetter boıynsha shegerimge shekteýler engizý;
3) baqylanatyn sheteldik kompanııa sheńberinde jeńildikterge shekteýler engizý.
Sondaı-aq, transferttik baǵa belgileý boıynsha túzetýler jobasy ázirlendi. Bul qazaqstandyq eksportqa ádil baǵany qamtamasyz etýge múmkindik beredi.
Budan basqa, Memleket basshysynyń tapsyrmasyna sáıkes osy jyldyń aqpan aıynda jeke tulǵalardyń bankrottyǵy máseleleri boıynsha zań jobasy engiziledi, qarjy mınıstrligi bir kózden satyp alýdy qoldanýdyń negizdiligin baqylaýdy qamtamasyz etedi.
Osy jyldan bastap Qordyń jáne barlyq ulttyq kompanııalardyń satyp alýlary «Kvazımemlekettik sektordyń jekelegen sýbektilerin satyp alý týraly» Zańmen retteledi. Sonymen qatar, qordy satyp alý tártibinde Qordyń ishki qujattaryna silteme normalar qarastyrylǵan. Osyǵan baılanysty, Qordyń jáne onyń enshiles kompanııalarynyń satyp alýyn júzege asyrýdyń búkil prosesi ózge ishki qujattarǵa jiberilýdi boldyrmaı, bir qujat deńgeıinde qaıta qaralatyn bolady.