Qazaqstan Prezıdentiniń Májilis otyrysynda sóılegen sózi tarıhı sóz boldy dep esepteımin. Barlyq el ómirindegi ózekti máseleler ortaǵa salyndy, ashyq aıtyldy.
Sonyń ishinde eldiń damýyna negizgi ózek bolatyn ekonomıkalyq saıasat, onyń ishinde ónerkásipti, óńdeý ónerkásibin, taý-ken ónerkásibin, aýyl sharýashylyǵyn damytý, aýyl sharýashylyǵyn sýbsıdııalaý máseleleri, sonymen birge halyqtyń eń qınalǵan máselesiniń biri – ınflıasııany, ıaǵnı baǵanyń sharyqtaýyn aýyzdyqtaý máselesine baılanysty, bilim sapasyn arttyrýǵa qatysty, halyqty tolǵandyryp otyrǵan densaýlyq máselesi, áleýmettik jaǵdaıy degen máselelerdiń barlyǵy da ortaǵa aıtyldy, sarapqa salynǵan salıqaly sóz boldy dep baǵalaýǵa bolady.
Bul bizdiń jańa kezeńge kóshkenimizdi bildiretin málimdeme, halyqtyń jaǵdaıyn jaqsartý. Birinshi kezekte – eldiń tutastyǵyn qamtamasyz etý, saqtaý, egemendikti saqtaý, osyǵan oraı, áskerılerdiń kúshin arttyrý, ishki halyqty, osy ishki jumyldyrý máselesi, keshegi qırandylardy tazartý, qalypqa keltirý, jaǵdaıdy retteý, osylardyń barlyǵy da óte bir ózekti, oıly, salmaqty jáne óte qajetti sheshimderdi tapsyrdy.
Úkimetke birqatar máseleni, qazir eki aıdyń ishinde osy tıisti sharalardy júzege asyratynyn kezeń-kezeńimen belgilep berdi. Sondyqtan da halyqtyń úmiti men senimin oıatqan, erteńgi kúnge degen osy senimdi ornyqtyrý eń bir basty másele boldy. Prezıdent sózinen osynyń bárin ańǵardyq. Iаǵnı «Qazaqstan halqyna» degen arnaıy qordyń qurylatyndyǵy belgili boldy. Demek bizdiń burynǵy kóptegen olıgarhııalyq júıeniń, jasalǵan bylyqtardyń saldarynan bolǵandyǵy bizge baıan boldy. Sondyqtan da myna «Samuryq-Qazyna», azamattardy kóp tolǵandyrǵan «ýtılsbor» máselesi, sonymen birge biraz qıyndyqtarǵa aparǵan baǵanyń shekten tys sheksiz betimen ketý máselesi, Ulttyq bankke 3-4 paıyz dálizin 2025 jylǵa deıin saqtaý máselesi aıtyldy.
Taǵy bir mańyzdy nárse – aımaqtardy damytý máselesindegi teńgerimdi saıasattyń bolmaǵandyǵy da ashyq aıtyldy. Osyǵan oraı bizdiń qazaqtyń bilimdi jastarynyń qataryn, ıaǵnı tehnıkalyq bilimdi mamandardy, ınjenerlerdi daıarlaý máselesine erekshe nazar aýdarý tapsyryldy. Jáne batys aımaqtarda joǵary jetekshi oqý oryndarynyń bes fılıalyn ashý, onyń ishinde eki tehnıkalyq baǵyttaǵy joǵary oqý oryndarynyń ashylatyndyǵy belgili bolyp jatyr. Munyń barlyǵy da halyqqa qýat beretin sózder dep esepteımin.
Eldiń ishki qýatyna kóp nárse baılanysty. Biz qıyndyqtan birge shyǵamyz. Birge eńseremiz. Urpaqtarymyzdyń baıandy bolashaǵyn bárimiz birge jasaımyz. Qazir azamattardyń Qazaq memleketi degen uǵymnyń tóńireginde birlesýi, qazaqtyń atyna kir keltirmeýi jónindegi bizdiń is-áreketimizdiń sanaly, syndarly, salmaqty bolýy óte mańyzdy.
Nurtóre JÚSIP,
senator