Parlament Májilisiniń otyrysynda Prezıdent Qasym-Jomart Toqaev áleýmettik-ekonomıkalyq salalardaǵy ózekti máselelerdi sheshý jóninde naqty mindetter qoıa otyryp, tehnıkalyq bilim berýge de basa nazar aýdarý kerektigin aıtqan.
Osy oraıda О́skemendegi D.Serikbaev atyndaǵy Shyǵys Qazaqstan tehnıkalyq ýnıversıtetiniń rektory Jasulan Shaımardanov Memleket basshysynyń jasaǵan málimdemesine qatysty óz pikirin bildirdi.
– Elimiz úshin bul da bir syn saǵat boldy. Kópshilik Memleket basshysyn UQShU áskerlerin elge engizý týraly sheshim qabyldaǵanyna oń qabaq tanyta qoımady. Biraq, osy qadam jaǵdaıdy baqylaýǵa alyp, óńirler men iri qalalardaǵy jaǵdaıdy turaqtandyrýǵa múmkindik berdi, – dep Prezıdentti qoldaıtynyn jetkizdi J.Shaımardanov. – Bilim berý salasyna qatysty aıtqan oılary da óte oryndy. Ásirese tehnıkalyq bilim berýdi nyǵaıta túsý kerek degenine eleń ete qaldyq. Halyq tyǵyz ornalasqan óńirler úshin grant mólsherin ulǵaıtý kerek dedi. Ol degenimiz, azamattardyń bilimge degen umtylysyn arttyrady. Muǵalimder tapshy óńirlerge úzdik pedagogtardy tartý kerektigin de basa aıtty. Shynynda da, qazir biz mektep oqýshylarynyń fızıka-matematıkalyq daıyndyǵy nashar ekenin sezemiz. Tehnıkalyq bilim berýdiń basymdyǵy sol, Prezıdent aıtqandaı, ónerkásip ınjenerleriniń jańa býynyn ósirý, – deıdi rektor.
Qalaı desek te, eldiń ekonomıkasy, áleýeti, óndirisi damýy úshin tehnokrat mamandar aýadaı qajet. Onsyz elimizdiń ilgerileýi ekitalaı. Al tehnıkalyq ýnıversıtet sol baǵytta jumys istep kele jatqan oblystaǵy irgeli oqý oryn. Prezıdent Q.Toqaevtyń aıtýynsha, jaqyn arada Reseıdiń ozyq tehnıkalyq joǵary oqý oryndarynyń fılıaldaryn elimizde ashý josparlanýda. 2025 jylǵa qaraı Qazaqstanda bedeldi sheteldik ýnıversıtetterdiń keminde 5 fılıalyn ashýdy kózdep otyr. Onyń eki fılıaly tehnıkalyq baǵytta.
– Buǵan deıin Respýblıkada jasaqtalǵan delegasııamyz Reseı Federasııasynyń úzdik tehnıkalyq ýnıversıtetterinde bolyp qaıtqany týraly jazǵan edik. Onda Qazaqstan men Reseı Federasııasy arasyndaǵy strategııalyq áriptestiktiń túrli aspektilerin talqylap, ózara is-qımyl joldaryn belgiledik, belgilengen josparlar boıynsha jumysty uıymdastyrý úshin jumys tobyn qurý týraly sheshim qabyldadyq. Reseı ýnıversıtetteri ınjenerlik kadrlardy daıarlaýǵa kómektesýge daıyn. Aıtar bolsam, bizdiń joǵary oqý ornymyz Máskeý ınjenerlik-fızıkalyq ınstıtýty, Ulttyq ıadrolyq zertteý ýnıversıtetimen birneshe jyldan beri yntymaqtastyqta jumys istep keledi. 2017 jyldan bastap bizdiń stýdentter JOO bazasynda praktıkadan ótedi, – dep buryn da atqarylǵan jumystarǵa toqtalyp ótti.
Endi Prezıdenttiń usynysynan keıin tehnıkalyq ýnıversıtet jumysy qaıta serpilip, tyń jobalardy qolǵa alady, jańa baǵytta jumys isteı bastaıdy. Kásibı kadrlardy daıyndap, el áleýetiniń artýyna edáýir septigin tıgizeri de anyq.