Semeı qalasynyń ákimi Baqytjan Baıahmetov áleýmettik nan, gaz jáne janar-jaǵarmaıdyń baǵasyn turaqtandyrý jóninde keńes ótkizdi, dep habarlaıdy Egemen.kz.
Nan men JJM jetkizý boıynsha jaǵdaı turaqty. Qalada 30-dan astam nan óndirýshi turaqty jumys isteıdi. Olardyń ishinde eń irileri: «SemNan», «Tumar» JShS jáne taǵy basqalary.
«SemNan» kún saıyn dúkenderge 110 teńgeden úsh jarym myń bólke áleýmettik nan jetkizedi. Qala ákimdiginiń saýda núktelerimen jasaǵan memorandýmyna sáıkes, dúkender nan úshin 5 teńgeden aspaıtyn ústemeaqy qosady. Nátıjesinde, atalǵan óndirýshiden alynǵan nannyń quny-115 teńge.
О́ziniń jeke naýbaıhanalary bar «Aprel», «Adal» sııaqty iri sýpermarketterde nan baǵasy odan da arzan. Onda nan 95-100 teńge aralyǵynda satylady.
«Un tartý kombınattary men sehtary turaqty jumys isteıdi. Bul qalamyzǵa syrttan nan ákelmeýge múmkindik beredi. Ákimdiktiń arnaıy jumys toby un men nan baǵasynyń quramdas bóligin eseptedi. 38% - bul JJM shyǵyndary, 18% - elektr energııasy. Oǵan qosa, salyqtar men jumysshylardyń jalaqysy bar. Memlekettik qoldaý sharalary qazirgi baǵalardy ustap qana qoımaı, birshama tómendeýine múmkindik beredi», dep habarlady Semeı qalasynyń ákimi Baqytjan Baıahmetov.
Janar-jaǵarmaıǵa keletin bolsaq, onda memlekettik retteý aıasynda baǵalar turaqtandy. Janar-jaǵarmaı quıý beketteri jelisinde Gelıos, Avantaj, taǵy basqalary A-92 markaly benzın lıtrine 177-180 teńge aralyǵynda satady. Avtokólik gazy - 60 teńgeden. Dızel otynynyń baǵasynyń aıtarlyqtaı tómendeýi baıqalady. Eger biraz ýaqyt buryn onyń baǵasy 300 teńgeden asyp ketse, qazir - 260 teńge.
«Qazaqstan prezıdenti Qasym-Jomart Kemeluly Toqaev óz sózinde, osy qıyn-qystaý kezeńde bizdiń azamattardy memlekettik qoldaý sharalary arqyly qorǵaýdy tapsyrdy. Bul sheshim ýaqytyly ári durys. Endi jergilikti atqarýshy bıliktiń mindeti - memleket basshysy men úkimettiń barlyq tapsyrmalaryn dál ári tıimdi oryndaý», dep atap ótti Baqytjan Baıahmetov.
Qala ákimi óz sózinde, qabyldanǵan sharalardyń nátıjesinde turmystyq gaz baǵasy da tómendegenin habarlady. 25 lıtrlik turmystyq gaz qazir 1700-2500 teńge aralyǵynda satylýda. Al, 50 lıtrlik gaz syıymdylyǵynyń baǵasy 5 myńnan 3400 teńgege deıin tómendedi.
Baqytjan Baıahmetov barlyq jergilikti óndirýshilerge semeılikterge qoldaý kórsetkeni úshin erekshe alǵys aıtyp, ákimdiktiń tıisti bólimderine shaǵyn jáne orta bıznestiń tıimdi jumys isteýi úshin barlyq jaǵdaıdy jasaýdy tapsyrdy.
Sondaı-aq, qala ákiminiń tapsyrmasy boıynsha, jaqyn arada turaqtandyrý qorynyń azyq-túligi bazar baǵasynan tómen baǵamen satylatyn dúkender men saýda núkteleriniń jelisi keńeıtiledi.