О́zine kesilgen ólim jazasyn 26 jyldan beri kútip otyrǵan Glenn Ford esimdi amerıkalyq azamat aqtalyp, túrmeden birjola bosap shyqty. Bul týraly Pravda.Rý habarlady.
«Alpys tórt jastaǵy Glenn Ford 26 jyldan beri ólim jazasyn kútip kelip, sottyń aqtaýymen túrmeden shyqty. Lýızıana túrmesine Ford 1983 jyly zerger ári saǵat jóndeýshi Izıdor Roızmandy óltirdi degen aıpypen túsken edi. Ford marqummen dostyq qarym-qatynasta bolǵan eken. Ol óziniń bul ólimge qatysy baryn udaıy joqqa shyǵaryp keldi. Alaıda, sot soǵan qaramastan, Fordty ólim jazasyna kesti», - delingen habarlamada.
Qylmystyq isti tekserý barysynda tergeýshiler kýálardy da, qylmys qarýyn da taba almapty. Al quramynda birde-bir afroamerıkalyq bolmaǵan alqabıler soty qara násildi kisini kináli dep tapty.
Ford ólim jazasyn 1988 jyldan beri kútip keledi. Tek jaqynda ǵana onyń advokattary óz qorǵaýshylarynyń ólim oqıǵasy oryn alǵan kezde zergerdiń úıinde bolýy múmkin emes ekenin dáleldep bere bildi. Biraq naǵyz qylmyskerdi úrkitip almas úshin onyń jaı-japsary ázirge ashylyp aıtylyp otyrǵan joq.
Bostandyqqa shyqqan boıda Glenn Ford ózin taǵdyry men adamdar aldap ketkendeı sezinetinin málimdedi. Endi óziniń osy jyldardaǵy azaby men jazasy úshin 300 myń dollar kóleminde ótemaqy óndirip almaqshy bolyp otyr.
Qurysh Nurymbet.
Derekkóz: Pravda.Rý.
Foto: ITAR-TASS.