Covid-19 ınfeksııasynyń taralýy boıynsha bir aptadan beri «qyzyl aımaqta» turǵan Aqtóbe oblysynda 19 qańtarda – 459, 20 qańtarda 586 naýqas tirkeldi. Osylaısha eki táýliktiń ishinde kúndelikti ósim 127 adamǵa jetti. Úı karantınine 5 608 adam alynǵan.
Oblystyq sanıtarlyq-epıdemıologııalyq baqylaý departamentiniń basshysy Raıhan Qoıshanovanyń aıtýynsha, ázirge óńirde «Omıkron» shtamyn juqtyrǵandar tirkelgen joq. Aýrýhanaǵa naýqastar negizinen «Delta» shtamynyń belgilerimen túsip jatyr. Jumadan bastap ınfeksııa taralýynyń jyldamdyǵyna baılanysty teatr, fılarmonııa, konsert zaldary, túngi klýbtar, karaoke, kınoteatrlar qyzmetine tyıym salyndy. Alaıda Ashyq baǵdarlamasymen kelýshilerge túngi saǵat 12-ge deıin qaladaǵy qoǵamdyq tamaqtandyrý oryndarynyń esigi ashyq. Qazirgi ýaqytta Ashyq baǵdarlamasyna qaladaǵy 4 443 mekeme qosylǵan.
Koronavırýs indeti taralǵaly beri óńirde 38 280 jaǵdaı tirkelse, onyń ishinde aýrý belgilerimen 28 858 adam, juqpaly derttiń sımptomsyz túrimen 9 422 jaǵdaı tirkelgen. 34 594 naýqas jazylyp shyqty.
Aýyl mektepteri men oqýshylar sany 600-den aspaıtyn qala mektepteri shtattyq rejimde jumys isteı beredi. Al oqýshylar sany 600-den asatyn bilim berý uıymdary onlaın oqýǵa kóshse, mektep ákimshiligi sheshimimen 1-2-synyp oqýshylarynyń shtattyq rejimde oqýyna jáne 3, 4, 5-synyptarda kezekshi synyptar ashýǵa ruqsat etildi. Kolledjder men JOO stýdentteri aralas formatta oqıdy. Vaksınalaýdyń tolyq kýrsyn alǵan stýdentter men oqýshylar shtattyq rejimde oqýyn jalǵastyrady.
Aqtóbe oblystyq densaýlyq saqtaý basqarmasy basshysynyń orynbasary Aıgúl Amanjolovanyń aıtýynsha, osy oqý jylynda 160 mektepten KVI juqtyrǵan 1 135 oqýshy tirkeldi. Sonyń ishinde 295 oqýshynyń kanıkýl kezinde, al 840 oqýshynyń sabaq bastalǵaly juqtyrǵany belgili boldy. Qyrkúıekten beri JOO stýdentteri arasynda 44, orta oqý oryndary stýdentteri arasynda 99 jaǵdaı tirkeldi. Oqytýshylar arasynda 152 adam osy dertpen syrqattandy.
Qazir óńirde 12-17 jasqa deıingi jasóspirimderdi Pfizer ekpesimen egý jalǵasyp jatyr. 5 606 jasóspirim birinshi qurammen, 3 381 jasóspirim ekinshi qurammen egildi. 732 júkti áıel de Pfizer ekpesin aldy.
О́ńirdegi ınfeksııalyq stasıonarda 2 729 kereýet jasaqtalyp, onda 247 naýqas em qabyldap jatyr. Al syrqaty aýyrlaǵan 17 adam jansaqtaý bóliminde. Aıta ketý kerek, qańtardyń ishinde KVI juqtyryp, derti asqynǵan 6 adam qaıtys boldy. Sońǵy málimet boıynsha, ınfeksııalyq kereýetter júktelimi – 49,8%, reanımasııalyq kereýetter júktelimi 22,6%-dy quraıdy. Epıdemııalyq jaǵdaı órshýi múmkin degen boljammen artyǵymen 2 233 oryn daıyndaldy. Aqtóbede PTR-test tapsyratyn 14 zerthana bar.
Byltyr aqpan aıynan bastap oblysqa jetkizilgen ekpeler sany – 1 mln 890 danany qurady. Osy ýaqytqa deıin Aqtóbe oblysynda 382 980 turǵyn ekpeniń birinshi quramymen, 358 591 adam ekinshi quramymen egildi. Sońǵy derek boıynsha, revaksınalaýdan 43 421 adam ótti.
Aqtóbe oblysy