Senat Tóraǵasynyń orynbasary Asqar Shákirov EQYU Parlamenttik Assambleıasy Bıýrosynyń onlaın-otyrysyna qatysty, dep habarlaıdy Egemen.kz QR Parlamenti Senatynyń baspasóz qyzmetine silteme jasap.
Parlamentarııler 24-25 aqpanda ótetin Parlamenttik Assambleıanyń qysqy otyrysyn ótkizýdiń formaty men sharttaryn, sondaı-aq 2022 jyly bolatyn saılaýdaǵy baıqaý mıssııalaryn talqylap, sheshimder qabyldady.
Otyrys sheńberinde ózekti halyqaralyq máseleler, sonyń ishinde Qazaqstandaǵy ahýal talqylandy. EQYU PA tóraǵasynyń orynbasary Asqar Shákirov eldegi qańtardaǵy qaıǵyly oqıǵalarǵa baılanysty mán-jaıdy egjeı-tegjeıli baıandady. Bıýro múshelerin atalǵan oqıǵalardyń baǵalanýymen, sondaı-aq Qazaqstan parlamentiniń tómengi palatasynda jáne otandyq bıznes ókilderiniń aldynda sóılegen sózderinde Prezıdent Qasym-Jomart Toqaevtyń aldaǵy kezeńge arnalǵan áleýmettik-ekonomıkalyq jáne qoǵamdyq-saıası salalardaǵy elimizdiń negizgi basymdyqtarymen tanystyrdy.
Memleket basshysynyń azamattardy, konstıtýsııalyq qurylysty jáne egemendikti tıimdi qorǵaý maqsatynda odan ári demokratııalandyrý, qoǵamdaǵy áleýmettik ádilettilikti qalpyna keltirý, quqyq qorǵaý organdarynyń jumysyn qaıta formattaý baǵytyndaǵy strategııalyq reformalaryna erekshe nazar aýdaryldy.
Bıýro músheleri aqpan aıynda EQYU Parlamenttik Assambleıasynyń depýtattary úshin Qazaqstandaǵy oqıǵalar boıynsha onlaın-brıfıng ótkizý týraly usynysty maquldady. Eýropalyq depýtattar óz kezeginde qaıǵyly oqıǵalarǵa baılanysty Qazaqstanǵa kóńil aıtyp, qoldaý bildirdi.
Asqar Shákirov EQYU PA ókilderin Qazaqstanǵa saparmen kelýge shaqyryp, onyń barysynda parlamentshiler eldegi jaǵdaımen tanysyp, tıisti máselelerdi talqylaı alatynyn jetkizdi. Bul usynys qabyldanyp, Parlamenttik Assambleıa Tóraǵasynyń orynbasary, Ortalyq Azııa boıynsha arnaıy ókil Pıa Kaýma Qazaqstanǵa saparmen kelýge nıet bildirdi.