Semeıde Ertis ózeniniń Beıbitshilik araly mańynda sý deńgeıi kóterilgen, dep jazady Egemen.kz.
Shyǵys Qazaqstan oblysy Tótenshe jaǵdaılar departamentiniń baspasóz qyzmeti 2022 jyly aýa raıynyń jyldaǵydan jyly bolý áserinen Ertis ózeninde muz jamylǵysy kesh qalyptasyp, sonyń saldarynan sý deńgeıiniń kóterilýi baıqalǵanyn málimdedi.
«2022 jyldyń 24 qańtarynda Ertis ózeninde sý deńgeıi 363 sm-ge deıin kóterildi. Jaýapty mekeme jer ústi jaǵalaýyn turǵyzdy. Turǵyn úılerdi sý basqan joq. Sýdyń bári shabyndyq alqapqa jiberildi. Tótenshe jaǵdaılar departamentiniń kúshteri, QR Tótenshe jaǵdaılar mınıstrligi áskerı bóliminiń áskerı qyzmetkerleri jáne jergilikti atqarýshy organdar jaǵalaýdy bekitý jumystaryn júrgizdi. Atap aıtqanda, topyraq úıindisi ornatylyp, qosymsha 120 tekshe metr ınertti materıal ákelingen», dep málimdedi óńirlik Tótenshe jaǵdaılar departamenti.
ShQO TJD baspasóz qyzmeti sý deńgeıine monıtorıng jasaý jumystary áli de jalǵasyp jatqanyn, qazirgi ýaqytta sý deńgeıi 37 sm-ge tómendep, úılerdi sý basý qaýpi joq ekenin jetkizdi.