Álemniń damyǵan elderinde adamı kapıtaldy memlekettiń, qoǵamnyń jáne ekonomıkanyń negizgi tuǵyry dep qabyldaıdy. Al ony damytýdyń jeke tulǵanyń da, jalpy halyqtyń da bilimine, densaýlyǵyna, ál-aýqatyna qatysty máselelerdi sheshýdegi mańyzy zor.
«Damyǵan elderdiń tájirıbesi kórsetip otyrǵandaı, bilim men ǵylymdy damytý, halyqty jumyspen qamtýǵa baǵyttalǵan reformalar men ınvestısııalardyń nátıjesine qarasaq, halyqtyń ómirin jaqsy jaqqa, ıaǵnı sapaly ózgertýge, ýaqyt talaptaryna saı keletin zııatkerlik qoǵam qurýǵa, tabysty jastardy tárbıeleýge bolady. Memleket shyn máninde órkendeýi úshin elimizdegi árbir azamattyń bilim alýǵa da múmkindikteri molyraq bolýy tıis. Eń ozyq bilim berý júıeleri oqýdaǵy jetistikteriniń joǵary deńgeıimen erekshelenedi. Máselen, Fınlıandııanyń orta bilim berý mekemeleriniń (mektepteriniń) jelisi eldiń qaı aýdanynda ornalasqanyna jáne onyń aýyldyq nemese qalalyq óńirge jatatyndyǵyna qaramastan aıtarlyqtaı birtekti. Ońtústik Koreıada, Taıvanda jáne Sıngapýrda artta qalǵan jáne akademııalyq turǵydan daıyndalǵan stýdentter arasyndaǵy statıstıkalyq aıyrmashylyq az», deıdi «Abaı atyndaǵy QazUPÝ» KEAQ Basqarma tóraǵasy – rektor Darhan Bilálov. Oqý orny basshysynyń aıtýynsha, birinshi orynǵa eń úzdik oqýshyny emes, jetistigi joǵary oqýshyny tańdaǵan durys. Sonda tek úlgerimi jaqsy bilim alýshynyń ǵana emes, árbir bilim alýshynyń jetistigine basymdyq beriletinin baıqaımyz. Bul aıtyp otyrǵan elderdiń mysalynan bizder, bilim alýshylardyń basym kópshiliginiń esebinen ulttyq bilim berý júıesiniń jetistigi aıqyn ekendigin baıqaımyz.
Aýyl men qala: bilim sapasyn teńestirý turǵysyndaǵy pikirimen bólisken rektor Darhan Bilálov «Qazaqstanda aýyl turǵyndarynyń sany aıtarlyqtaı joǵary. Sondyqtan qala men aýyl mektepteri arasyndaǵy teńsizdikti sheshýge basymdyq beriledi jáne naqty qadamdardy talap etedi. Aýyldyq jerde orta bilim berýdi zamanaýı úlgige saı damytý úshin aldymen mynadaı naqty qadamdar jasalý kerek. Máselen: mektepterdi (sonyń ishinde shaǵyn mektepterdi) bilikti pedagogıkalyq kadrlarmen qamtamasyz etý; eńbekaqy júıesin ózgertý; kabınetti úzdik oqý-ádistemelik materıaldarmen tolyq qamtamasyz etý; bilim berý prosesine aqparattyq tehnologııalardy ıntegrasııalaý arqyly oqýshylardy jańa tehnologııaǵa beıimdeý; senimdi ınternet-baılanyspen, kompıýterlik synyptarmen jáne jańa sıfrlyq tehnologııalarmen (3D-prınter, robototehnıka, jasandy ıntellekt, tolyqtyrylǵan nusqaýlyq quraldary jáne taǵy da basqa) tutastaı jabdyqtandyrý; óńirlik mektepterdiń resýrstyq ortalyqtaryn qura otyryp, oqytý ádistemelerin jańǵyrtý jáne bilim berýdiń onlaın-júıelerin damytý. Memleket tarapynan bul tizip kórsetilgen mindetter der kezinde sheshimin taýyp jáne bul mindetterdiń júzege asýyna respýblıkalyq bıýdjetten arnaıy qarajat qarastyrylǵan. Al pedagogıkalyq joǵary oqý oryndary aýyl jáne qala oqýshylary arasyndaǵy bilim alshaqtyǵyn joıý úderisine qalaı kómektese alady? О́te oryndy saýal. Oǵan tómendegishe jaýap berip kórelik. Eń aldymen, aýyldyq óńir úshin muǵalimder daıarlaý kerek. Máselen, Abaı atyndaǵy QazUPÝ-da shaǵyn jınaqty mektepterge pedagog kadrlardy daıarlaý boıynsha arnaıy jumystar júrgizilýde», dep atap ótti.