Bıylǵy 21 qańtarda Qazaqstan Respýblıkasynyń Prezıdenti Qasym-Jomart Kemeluly Toqaev kirme joldardy retke keltirý boıynsha tapsyrmalar berdi, dep habarlaıdy Egemen.kz primeminister.kz-ke silteme jasap.
Osyǵan baılanysty Qazaqstan Respýblıkasy Premer-Mınıstriniń birinshi orynbasary R. Sklıar kirme joldar salasynda qyzmet kórsetetin tabıǵı monopolııalar sýbektileriniń qyzmetine tekserý júrgizýdi, qyzmetter quny baǵasynyń belgilenýin taldaýdy jáne tarıfterdi tómendetý boıynsha sharalar qabyldaýdy tapsyrdy.
Máselen, bıylǵy 1 aqpannan bastap elimizdiń birqatar óńirinde (Nur-Sultan, Almaty qalalary, Qyzylorda, Batys Qazaqstan, Qostanaı, Almaty, Pavlodar, Aqmola, Qaraǵandy, Shyǵys Qazaqstan, Aqtóbe jáne Soltústik Qazaqstan oblystary) kirme joldardy berýmen aınalysatyn 21 sýbektiniń tarıfteri orta eseppen 80%-ǵa tómendedi.
Sondaı-aq Pavlodar oblysynda kirme joldar qyzmetterin usynatyn «ARMAN KALA LTD» JShS tarıfteri 93%-ǵa (1741,53 teńge/vagon*km-den 118,07 teńge/vagon*km-ge deıin) tómendetildi.
Bul shara Qazaqstannyń energııa óndirýshi uıymdary úshin otynnyń negizgi jetkizýshisi «Bogatyr Kómir» JShS kómiriniń qunyna oń áser etedi.
Sonymen qatar obektıvti baǵa belgileý maqsatynda elimizdiń negizgi temir jol obektilerinde ornalasqan kirme joldardyń iri balans ustaýshysy «Kólik servısi ortalyǵy» AQ (2117,98 teńge/vagon*km-den 164,29 teńge/vagon*km-ge deıin) tarıfteri 92%-ǵa tómendedi. Tarıfter osy jylǵy 1 naýryzdan bastap qoldanysqa engiziledi.
Atalǵan sharalar kólik shyǵystaryna jáne taýarlardyń, onyń ishinde azyq-túlik ónimderiniń túpkilikti qunyna oń áser etedi.
Úkimettiń osy baǵyttaǵy jumysy odan ári jalǵasyn tabady.