Memleket basshysy Qasym-Jomart Toqaev Qazaqstanda álemdegi eń bedeldi joǵary oqý oryndarynyń bes fılıalyn ashýdy tapsyrdy. Fılıaldardy ashý boıynsha júrgizilip jatqan jumystar týraly Bilim jáne ǵylym mınıstri Ashat Aımaǵambetov baıandady, dep habarlaıdy Egemen.kz.
«Memleket basshysynyń tapsyrmasy boıynsha elimizde eń bedeldi sheteldik ýnıversıtetterdiń 5 fılıaly ashylady. Qazirgi ýaqytta elde De Montfort Lester Brıtan ýnıversıtetiniń fılıaly jumys isteı bastady. Sondaı-aq Soltústik Qazaqstan memlekettik ýnıversıtetin Arızona ýnıversıtetiniń senimdi basqarýyna berý boıynsha jumystar júrgizilýde. Tehnıkalyq baǵyttar boıynsha Reseıdiń úzdik joǵary oqý oryndarynyń fılıaldaryn ashý boıynsha kelissózder bastaldy. Qazirgi ýaqytta taǵy bir Brıtan ýnıversıtetiniń fılıalyn ashý boıynsha kelissózder júrgizilýde», dedi Ashat Aımaǵambetov Úkimet otyrysynda.
Mınıstr atap ótkendeı, joǵary oqý oryndarynyń eki fılıalyn elimizdiń batys óńirlerinde ashý josparlanýda.
Buǵan deıin Premer-Mınıstr Álıhan Smaıylov Bilim mınıstrligine 7 aqpanǵa deıin jetekshi sheteldik joǵary oqý oryndarynyń fılıaldaryn ashý boıynsha Jol kartasyn engizýdi tapsyrǵan bolatyn.