Qudaı bergen ónerdiń tórkinin, tegin surap qaıtemiz. Onyń ústine óner ult tańdamaıdy. Gradskıı qaıtqanda, onyń «Kak molody my bylı» dep án aıtyp turǵan beınesi qarashyǵymyzǵa qonystanyp aldy. «Reseı daýysy» ulttyq baıqaýyn tamashalap otyryp, onyń talǵamyna, mýzykany túsinýine, notany dóp tanýyna, jalpy ishki álemine qaıran qalýshy edik. Ajalyna da dál solaı tańǵaldyq. Aıqaılaǵannyń bárine burala bermeıtin aqsúıek ánshi estradanyń shyńy edi. Qosh, maestro!
Taqyrypty tarqatpas buryn shaǵyn ańdatpa aıta ketsek. Biz «Kak molody my bylı» ánin tárjimalaýǵa batpadyq. Shyǵarmanyń qazaqsha balamasyn saýatty oqyrman ózi salmaqtap alar degen oı qylań berdi.
Efırge sońǵy ret shyqqanda kishkentaı kózderi botalap, oryndyqta qýshıyńqyrap, uzyn shashy jelkesine túsip, tómenshik kúıde otyrǵan edi. Sózin qyrmyzydaı sozyp, jibekteı taldap aıtqanda bergi bette otyrǵan biz de aq sóılegenine ańtaryla qol shapalaqtaǵanbyz. Ásirese qazaq estradasynyń juldyzy Álisher Kárimovke jalǵyz ózi tańdaý jasaǵanda. Aqyry jerlesimiz ustazy baǵalaǵandaı top ishinen sýyrylyp alǵa shyǵyp, sońǵy márege deıin jetip, kórermenniń kózaıymyna aınaldy. Tulpardy turysynan tanyǵan Gradskııdiń bul sheshimi shynaıylyǵymen shyraılanbaı, onyń uly mýzykant ekenin de dáleldeı tústi.
Aıaǵyn mamyrlap basyp, sahnaǵa shyqqan bozbala Gradskıı keńes dáýirinde rokerler alleıasyn qalyptastyrdy. Qara kózildirigimen qıyla qaraǵanda boıjetken bitken boıtumaryndaı bıik tutyp, qarasha halyq ónerine birden bas ıdi. Sol shaqta lırıkalyq ánderdiń anasyna aınalǵan kompozıtor Aleksandra Pahmýtovanyń shyǵarmashylyǵyna rok-mýzykanttar qyzyǵady dep eshkim oılamasa kerek. Alaıda bul aksıomaǵa Aleksandr Gradskıı núkte qoıdy. Alǵashynda onyń daýysy memlekettik radıolarda, kórkem fılmderde kúnige estilip jatty.
1970 jyly Gradskıı «Mosfılmde» dybys ınjeneri Vıktor Babýshkınniń qolqalaýymen «Ǵashyqtar romansy» fılmine án jazady. Buǵan deıin Babýshkın ataqty Pahmýtovamen jumys istegendikten, sol sátte-aq onyń talǵamyna saı, kelesi saýndtrekterdi oryndaıtyn ánshini tapqanyna qýana ketedi. Osylaısha jas ánshige «Qaharly qurylys otrıady» perkýssııasyn jáne «Kak molody my bylı» lırıkasyn jazyp alýdy usynady. Eki týyndyny da Aleksandra Nıkolaevna «Úshinshi kýrstaǵy mahabbatym» fılmine arnap jazǵan edi. Syralǵy sazger áýendi kez kelgen ártis oryndaı alatyn tynysh kameralyq án retinde qabyldady. Sóıtip alǵashynda belgili orys ártisi Elena Kambýrovany úmitker retinde tańdaıdy.
«Mıhaıl Shatrovtyń «Úshinshi kýrstaǵy mahabbatym» pesasy boıynsha túsirilgen kınokartına saýndtregin oryndaýǵa usynys tústi. Shynymdy aıtsam, bul án maǵan múldem unamady», deıdi óz esteliginde E.Kambýrova. Sol sátte Aleksandr Gradskıı «Mosfılm» kınostýdııasynyń pavılondaryn aralap júrse kerek, kompozıtorǵa «án joǵary regıstrde dybystalsa jaqsy bolar edi» degen usynys tastaıdy. Qarańyzshy, alǵashqy kezdesýde-aq partıtýrany kórsetýdi suraǵan Gradskıı kompozıtordy tań qaldyrady. Pahmýtova tákappar uzyn shashty jigitke tańdana qarap, esep beredi.
«Men partıtýraǵa qaradym, muny úshinshi tarmaqta oryndaý qyzyqty bolýy múmkin ekenin túsindim. Qandaı da bir sharyqtaý shegin jasaý kerek bolyp kórindi. Kompozıtor alyp shyǵa alatynyma kúmánmen qarady. Men barymdy saldym», deıdi bertinde ózi. Ánniń hıtke aınalaryna avtor da, aqyn da senbese kerek, tek bozbala ánshi ójettigimen eldi moıyndatady. Iá, bul tusta jas Gradskııdiń jankeshtiligine qaıran qalmasqa bolmas. Onyń arqasynda úshinshi tarmaqtyń dybys úndesýi tutas oktavaǵa kóterilip, lırıkalyq án dramalyq kúshke ıe bolady.
Án jaryqqa shyqqannan keıin Gradskııdiń bedeli sharyqtady. Ol bir sátte Sport saraılaryna myńdaǵan kórermen jınaı aldy jáne baǵasy qymbat ánshilerdiń biri sanaldy. Árıne, onyń basty sebebi – «Kak molody my bylı» áni edi.
Al jasampaz Pahmýtova oǵan deıin de, keıin de qanshama án jazdy, biraq eshqaısysy atalǵan týyndynyń deńgeıine jetpedi. 26 jasynda «qaıran, jastyq» dep án shyrqaǵan Gradskıı endi ómirde joq. Kózden ketken, kóńilde kómeskilengen súgiretterdi qaıta eske túsirip, jasamystyń janaryna jaýqazyn jas uıalatqan jaryq juldyz máńgi aspan tórine jaıǵasty.