Petropavlda kóp qabatty úıdiń birinshi qabatynda órt shyǵyp, mamandar 23 adamdy evakýasııalady, 4 turǵyndy qutqardy, dep habarlaıdy Egemen.kz.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin saǵat 7.56 kezinde «101» jedel arnasyna Petropavldaǵy Internasıonal kóshesi, 21 úıde órt shyqqany týraly habarlama túsedi.
О́rt sóndirýshiler kelgende bes qabatty turǵyn úıdiń birinshi qabatyndaǵy páterdiń terezesinen qoıý tútin shyǵyp jatqan. Jabyq esikti buzyp ashyp, mamandar órtti sóndirýge kiristi. Osy ýaqytta qutqarý jumystary qatar júrgizilip, joǵary qabattardan baspaldaqpen 23 adam, sonyń ishinde 4 bala qaýipsiz jerge shyǵaryldy. Taǵy 3 eresek pen 1 bala qutqaryldy.
Oqıǵa ornynda 23 órt sóndirýshi men 8 tehnıka jumys istedi. О́rt saǵat 8.30-dar shamasynda tolyq sóndirildi. Páterdegi dúnıe-múlik tolyq zaqymdandy. Zardap shekkender men qaza tapqandar joq. О́rttiń shyǵý sebebi ázirge belgisiz.
Byltyr aqpan aıynda osy kóp qabatty úıdiń birinshi qabatynda ornalasqan dámhanalardyń birinde órt shyǵyp, gaz ballony jarylǵan edi.