Aqmola oblysynda byltyrǵy kóne jáne orta ǵasyrlardaǵy tarıhı eskertkishterge jasalǵan ekspedısııanyń nátıjeleri boıynsha «Aqmola oblysynyń mádenı murasy: jańa zertteýler» atty ǵylymı-tanymdyq basylym jaryq kórdi.
«О́tken jyly Aqmola oblysynyń Mádenıet basqarmasy óńir ákimdigimen birlesip Jaqsy jáne Qorǵaljyn aýdandarynda ǵylymı-zertteý ekspedısııalaryn uıymdastyrdy. Ekspedısııa aıasynda Baýbek batyr qorymynda, Jánibek-Shalqar kesenesinde jáne Bytyǵaı kesheninde arheologııalyq qazba jumystary júrgizildi. Zertteýge Ulttyq murajaıdyń ǵylymı qyzmetkerleri, Aqmola tarıhı-ólketaný murajaıynyń, Jaqsy aýdanynyń Zaporoje orta mektebiniń muǵalimderi, sondaı-aq L.Gýmılev atyndaǵy Eýrazııa ulttyq ýnıversıtetiniń stýdentteri men basqa da mamandardan turatyn ǵylymı top qatysty. Birqatar jekelegen sala mamandarynyń kómegimen geoaqparattyq jáne jaratylystaný ǵylymynyń jetistikteri arqyly qorytyndylar alýǵa qol jetkizdik», dedi oblystyq Mádenıet basqarmasynyń basshysy Aıgúl Sábıtova.
Basqarma basshysy atap ótkendeı, qazba jumystary barysynda súıek qaldyqtary, ejelgi monetalar tabylǵan. Olardy zertteýge Reseıden kelgen mamandar qatysty. Monetalardyń quramyn jáne jerleý oryndarynyń naqty jasy men genetıkalyq shyǵý tegin anyqtaýǵa múmkindik týdy. Brıfıngte aıtylǵandaı, ekspedısııa nátıjesi boıynsha zerttelgen jerlerdiń sıfrly modelin, nysandardyń egjeı-tegjeıli jospary men kartasyn, Jánibek-Shalqar kesenesiniń jáne Baýbek batyr jerlengen jeriniń 3D-beınesi daıyndaldy. Munyń bári «Aqmola oblysynyń mádenı murasy: jańa zertteýler» atty ǵylymı-tanymdyq basylymynda berilgen.