Búgin ǵylym salasynyń úzdik qyzmetkerleri marapattaldy. Sharaǵa QR Bilim jáne ǵylym mınıstri Ashat Aımaǵambetov qatysty, dep jazady Egemen.kz.
Saltanatty is-shara barysynda elimizdiń jyl saıynǵy «úzdik ǵylymı qyzmetker» syılyǵynyń 36 ıegeri, ǵylym salasyndaǵy ataýly syılyqtardyń 10 ıegeri marapattaldy.
Odan bólek, Bilim jáne ǵylym mınıstri memlekettik ǵylymı stıpendııanyń 10 ıegeri, jetekshi ǵalymdardy jáne vedomstvolyq syılyqtyń 7 laýreatyn marapattady.
Shara barysynda mınıstr ǵylymdy qarjylandyrý isiniń ulǵaıǵanyn habarlady.
Ǵylymı jobalardy qarjylandyrýǵa arnalǵan konkýrstar 3 jylda bir ret emes, endi jyl saıyn ótkiziledi. Sonymen qatar, alǵash ret 2022 jyly joǵary oqý oryndary men ǵylymı zertteý ınstıtýttarynda postdoktorantýra engiziledi.
Mınıstr ataǵandaı, eger buryn ǵalymdar jalaqyny tek konkýrstar arqyly ǵana alatyn bolsa, endi jetekshi ǵalymdar turaqty jalaqy alady. Bul 85 ǵylymı uıymnyń 1 200-ge jýyq jetekshi ǵalymdarynyń jaǵdaıyn jaqsartady.
«Buǵan qosa elimiz úshin asa mańyzdy fýndamentaldy zertteýlermen aınalysatyn tarıh jáne etnologııa ınstıtýty, til bilimi ınstıtýty, matematıka ınstıtýty, ıadrolyq fızıka ınstıtýty, ádebıet jáne óner ınstıtýty, fılosofııa jáne basqa da ınstıtýttardyń ǵalymdary endi jalaqylaryn turaqty rejımde alyp, úzdiksiz jumys isteıdi», dedi Ashat Aımaǵambetov.