Qańtar oqıǵasyna qatysty tergeý barysynda qysym kórsetý faktisimen 15 qylmystyq is qozǵaldy. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy Egemen.kz.
«Sonymen qatar buryn qamaýǵa alynǵandardyń bultartpaý sharalaryn jeńildetip jatyrmyz. Mysaly, prokýrorlar Almaty qalasynda - 59, Qyzylorda oblysynda - 3 jáne Shyǵys Qazaqstanda - 1 adamdy qamaýdan bosatty. Olardan eshqaıda ketpeý týraly qolhat alyndy. Sol sııaqty Qyzylorda prokýrorlarynyń talaby boıynsha sot sanksııasymen úsh adam úıqamaqqa jiberildi», dedi ol ortalyq kommýnıkasııalar qyzmetidegi brıfıng barysynda.
Onyń aıtýynsha, osy atqarylyp jatqan jumystardyń ashyqtyǵyn qamtamasyz etý úshin qoǵamdyq uıymdarmen tyǵyz baılanys ornatylǵan.
«Sondaı-aq tergeýdegi zańsyz áreketter týraly shaǵymdardy erekshe baqylaýǵa alyp, tekserýdemiz. Búgingi tańda prokýratýraǵa 108 aryz tústi. Olardyń negizinde laýazymdyq ókilettikti asyra paıdalaný, tergeý barysynda qysym kórsetý faktileri boıynsha 15 qylmystyq is qozǵaldy.
Atap aıtqanda, Atyraýdaǵy «Dınamo» stadıonynda oryn alǵan jaǵdaılar, Taldyqorǵan qalasynyń turǵyny Batyrbaevqa zańsyz kúsh qoldaný jáne basqa da faktiler bar. Osyndaı oqıǵalardyń jan-jaqty tolyq tekserilýin qamtamsyz etý úshin olar boıynsha tergeý júrgizý jemqorlyqqa qarsy kúres qyzmetine jáne arnaýly prokýrorlarǵa tapsyryldy», dedi Eldos Qılymjanov.