Qańtar aıynda elimizde bolǵan tártipsizdikterden keıin maqsatty aqparattyq naýqan bastaldy. Olar eldiń sanasyn manıpýlıasııalaýdy maqsat tutty. IIM Tergeý basqarmasynyń bastyǵy Sanjar Ádilov osyndaı málimdeme jasady, dep habarlaıdy Egemen.kz.
Ol búgingi tańda aqparattyq keńistikte qańtar aıynda bolǵan oqıǵany burmalaý baıqalatynyn tiline tıek etti.
«Elimizde bolǵan mıtıngilerdiń beıbit sıpaty men quqyq qorǵaý organdarynyń zańsyz áreketteri jıi kórinis taýyp jatyr. Munyń bári bılik qabyldaǵan sheshimderdiń bedelin túsirý, eń bastysy tártipsizdikterdi uıymdastyrýshylar men qatysýshylar jaýapkershilikten qasaqana jaltarýy úshin jasalǵan qadam ekeni ras. Otandastarymyz munyń qoǵamdyq sanany manıpýlıasııalaýǵa baǵyttalǵan maqsatty aqparattyq jaǵdaı ekenin túsingenderi lázim», dedi Sanjar Ádilov Ortalyq kommýnıkasııalar qyzmetinde ótken baspasóz máslıhatynda.
Ol azamattardan tek resmı, tekserilgen aqparat kózderine senýdi ótindi. Jalǵan aqparat taratýǵa bolmaıtynyn atap ótti.