Qostanaı oblysyndaǵy Áıet aýylynyń ákimi 1,5 mln teńgege syrǵanaq saldyrǵan, dep habarlaıdy Egemen.kz Qazaqstan telearnasyna silteme jasap.
Bul qańqasy aǵash taqtaıdan qurastyrylǵan bireýine ǵana ketken qarjy. Al azǵantaı qardy kishkene tómpeshik etip úıgen ekinshisiniń quny - 248 myń teńge. Onyń ózi belgilengen merziminen jarty aı keshiktirilip jasalǵan.
«Taqtaılar durys súrgilenbegen, tıisti suıyqtyqpen óńdelmegen. О́ziniń baǵasyna múlde saı kelmeıdi. Al myna qardan úıilgen syrǵanaqty tek 13 qańtarda jasaı bastady. Al memlekettik tapsyrys boıynsha ol 31 jeltoqsanda paıdalanýǵa berilýi tıis edi. Qazirgi keıpine qarap men ony balalardyń syrǵanap oınaýyna jaramdy dep oılamaımyn», dedi Galına Fırýs esimdi Áıet aýylynyń turǵyny.
Turǵyndar qar músinder men syrǵanaqtarǵa qansha qarjy bólingenin melmekettik satyp alý saıtynan kóripti.
«Jalǵyz jolbarystyń quny 104 myń teńge turady deıdi. Sonymen birge munda Aıaz ata men Qarsha qyzdyń da músini boldy. Bári de sapasyz daıyndalǵan. Kóp uzatpaı qańtardyń basynda olardyń bárin qulatyp, ornyn tazalap tastady», dedi aýyl turǵyny Janat Makýmova.
Aýyl ákiminiń syrqattanyp qalýyna baılanysty osy oqıǵaǵa onyń orynbasary pikir bildirgen.
«Mine, osyndaı syrǵanaq Almaty qalasynda 1 mln 200 myń teńgeniń syrtynda turady. Ony ákelip ornatýdy qossaq 2 mln teńgeniń syrtyna shyǵady. Sondyqtan biz barynsha arzanǵa ornattyq», dedi Áıet aýyly ákiminiń orynbasary Abzal Aryqov.
Bul sózdi aýdan basshylary da qostap otyr.
«Qardy syrttan tasydy. Iаǵnı, traktor qyzmetiniń quny bar, janar-jaǵarmaı bar degendeı. Onyń syrtynda aptasyna bir ret sý quıyp syrǵanaqty kútý kerek», dedi B. Maılın aýdany ákiminiń orynbasary Marat Álmaǵanbetov.
Merdiger ekinshi syrǵanaqty tapsyrýdy merziminen keshiktirgeni úshin 248 myń teńgeni aýyl bıýdjetine qaıtarǵan. Aýdan basshylary basqa zańǵa qaıshylyq tapaǵan. Alaıda olardyń bul pikirmen jergilikti turǵyndar kelispeıdi. Olar «aýyl ákimniń áreketin tekserýdi surap, quzyrly oryndarǵa jazbasha shaǵym» túsirdi.