Memleket basshysynyń tóraǵalyǵymen ótip jatqan Úkimettiń keńeıtilgen otyrysynda Úkimet basshysy Álıhan Smaıylov atqarylǵan jumystardyń nátıjesin baıandady, dep jazady Egemen.kz.
«Osy jyldyń qańtar aıynda bolǵan qaıǵyly oqıǵalar elimizdiń áleýmettik-ekonomıkalyq damý josparyna túzetýler engizdi. Áleýmettik-ekonomıkalyq jáne qoǵamdyq saıası jaǵdaıdy turaqtandyrý maqsatynda osy jyldyń basynan bastap Úkimetke shuǵyl jáne júıeli 108 tapsyrma berdińiz. Búgingi kúni 44 tapsyrma oryndaldy. Atap aıtqanda, áleýmettik-ekonomıkalyq jaǵdaıdy turaqtandyrý jónindegi jedel is-qımyl josparyn iske asyrý sheńberinde eldiń barlyq aımaǵynda qoǵamdyq tártip qalpyna keltirildi», dep aıtty Smaıylov.
Premer-mınıstr atap ótkendeı, kommýnaldyq qyzmetterdiń baǵalary men tarıfteriniń ósýine jarty jylǵa moratorıı engizildi. Janar-jaǵarmaıǵa jáne gazǵa shekti baǵalar belgilendi.
«Úkimet janyndaǵy otandyq kásipkerler keńesi quryldy. Ýtılızasııalyq alymdar memleketke berildi. 100 paıyz memlekettik «Jasyl Damý» AQ jaýapty operator bolyp aıqyndaldy. «Qazaqstan halqyna» qoǵamdyq qory quryldy jáne oǵan búgingi kúni 115 mlrd teńge qarajat jınaldy», dedi Úkimet basshysy.
Odan bólek, shaǵyn jáne orta bızneske qatysty karantındik sharalar qaıta qaralyp, jeńildetildi.