QR Básekelestikti qorǵaý jáne damytý agenttiginiń Atyraý oblysy boıynsha departamenti monopolııalyq joǵary baǵanyń belgilenýine baılanysty «Suıytylǵan munaı gazyn saqtaý parki» JShS gaz jelisi uıymyna qatysty tergeýdi bastady, dep habarlaıdy Egemen.kz.
Básekelestik jaǵdaıyn taldaý nátıjeleri boıynsha «Suıytylǵan munaı gazyn saqtaý parki» JShS Atyraý oblysynyń geografııalyq shekaralarynda suıytylǵan munaı gazyn qaıtalama-kóterme saýdada ótkizý naryǵynda ústem jaǵdaıǵa ıe ekendigi anyqtaldy.
Sonymen qatar Atyraý oblysy boıynsha Ekonomıkalyq tergeý departamenti atalǵan gaz jelisi uıymynyń qyzmetine tekserý júrgizdi, oǵan óńirdiń monopolııaǵa qarsy departamentiniń mamany qatysty. Tekserý nátıjeleri boıynsha 2019-2021 jyldary monopolııalyq joǵary baǵalardy belgileý bóliginde monopolııalyq jaǵdaıdy teris paıdalaný belgileri anyqtaldy.
«Tekserý nátıjeleri negizinde Atyraý oblysy boıynsha Ekonomıkalyq tergeý departamenti «Suıytylǵan munaı gazyn saqtaý parki» JShS-ne qatysty qylmystyq is qozǵady, memleket bıýdjetine monopolııalyq kiristi alý boıynsha jumystar júrgizilýde», dep jazady QR Básekelestikti qorǵaý jáne damytý agenttiginiń baspasóz qyzmeti.
Bul rette monopolııaǵa qarsy departament «Suıytylǵan munaı gazyn saqtaý parki» JShS-ǵa qatysty tergeýdi jalǵastyrýda, tergeý barasynda 2017-2021 jyldardaǵy qyzmet tekseriledi.