QR Premer-Mınıstriniń orynbasary – saýda jáne ıntegrasııa mınıstri Baqyt Sultanov Ozon reseılik marketpleısiniń basqarýshy dırektory Sergeı Belıakovpen kezdesti, dep jazady Egemen.kz primeminister.kz-ke silteme jasap.
Qos tarap Qazaqstanda Ozon kompanııasynyń damýyn, sondaı-aq ózara is-qımyldyń ózekti máseleleri - salyq salý, elektrondyq qujat aınalymyn talqylady.
«Qazaqstanda, búkil álemdegi sekildi, qazirgi tańda elektrondyq kommersııa men marketpleıster, onyń ishinde halyqaralyq alańdar belsendi túrde damyp jatyr. Qazaqstandyq óndirýshiler úshin bul el ishinde de, halyqaralyq naryqtarda da saýda kólemi men ótkizý geografııasyn ulǵaıtýdyń tamasha múmkindigi», dedi Baqyt Sultanov.
Qazaqstandaǵy Ozon kompanııasynyń qyzmeti eki negizgi baǵytta damıtyn bolady: logıstıkalyq ınfraqurylym qurý jáne qazaqstandyq kásipkerlerdi marketpleıs platformasyna shyǵarý. 2021 jylǵy jeltoqsanda «QazTrade» AQ men Ozon arasynda Yntymaqtastyq týraly memorandýmǵa qol qoıyldy. Ozon basqarýshy dırektory Sergeı Belıakov kompanııa óziniń logıstıkalyq qurylymyn respýblıkada damytýdy josparlap otyrǵanyn málimdedi.
«Iri logıstıkalyq nysannyń ashylýy óńirden satýshylar sanyn orta eseppen 50%-ǵa arttyrýǵa múmkindik beredi – olar taýardy satý alańyna tezirek ári arzan baǵada jetkize alady, sondaı-aq tipti eldiń eń shalǵaı aýdandaryndaǵy satyp alýshylar da óz tapsyrystaryn tezirek ala alady», dedi S. Belıakov.