Qostanaı oblysy Qarabalyq aýdanynyń tártip saqshylary aýyr qylmys jasaǵan kúdiktini ustady, dep habarlaıdy Egemen.kz.
13 aqpan kúni Qarabalyq polısııa bóliminiń kezekshi bólimine aýyl turǵyny eki er adamdy urǵany týraly habarlama kelip tústi. Bul týraly 20 jastaǵy Qarabalyq aýdanynyń turǵyny jáne oqıǵanyń kýágeri habarlaǵan.
Oqıǵa ornyna birinshi bolyp jetken patrýldik polısııa qyzmetkerleri qashyp bara jatqan qylmyskerlerdi kórdi.
Patrýldik polısııa qyzmetkeri qashyp ketken adamdy ózenniń tusynda ustady. Ony quryqtaý kezinde tártip saqshylary eskertý retinde aýaǵa oq atýǵa májbúr boldy. «Quqyq qorǵaý qyzmeti týraly» Zańnyń 61-babyna sáıkes qarý qoldaný zańdy dep tanyldy.
Buryn urlyq jasaǵany úshin sottalǵan 23 jastaǵy aýyl turǵyny qamaýǵa alyndy. Tóbelesten zardap shekken er adamdar aýrýhanaǵa jetkizildi. Keıinnen olardyń biri, 41 jastaǵy Qarabalyq aýdanynyń turǵyny oblystyq aýrýhanada alǵan jaraqattarynan qaıtys boldy.
Qazirgi ýaqytta QR Qylmystyq Kodeksiniń 106-babyna saı «Densaýlyqqa qasaqana aýyr zııan keltirý» zańy boıynsha tergeý bastaldy.
Jedel-tergeý toby oqıǵa ornyna tekserý júrgizip, qylmysty kórgen adamdardan jaýap aldy. Tóbeles aýyl turǵyndary arasyndaǵy janjaldan týyndaǵan. Sotqa deıingi tergep-tekserý sheńberinde barlyq qajetti is-sharalar júrgizilip, saraptamalar jasaldy.
Aıana Toǵanbek
Eýrazııa ulttyq ýnıversıteti, jýrnalıstıka jáne saıasattaný fakýltetiniń,
baspa isi mamandyǵynyń 4-kýrs stýdenti