«Qazaqstan» ulttyq arnasyna suhbat bergen Prezıdent Qasym-Jomart Toqaev qasiretti qańtar oqıǵasynda jazyqsyz japa shekken azamattardyń máselesine beıjaı qaraýǵa bolmaıtynyn shegelep aıtty, dep habarlaıdy Egemen.kz.
Tipti quramyna adam quqyqtary jónindegi ýákil men zańgerler engen qoǵamdyq komıssııa máseleniń mánisin zertteýge kirisip ketkenin de atap ótti. Olar árbir istiń zańdylyǵyn muqııat zerdelemek. Prezıdent óz sózinde qoǵamdyq komıssııanyń jumysyna bıliktiń de, quqyq qorǵaý organdarynyń da aralaspaıtynyn tiline tıek etti.
«Iá, bul másele jóninde jaqsy bilemin. Keıbir azamattarymyz meniń atyma beıne úndeý jazyp, áleýmettik jelilerde taratyp jatyr. Muny da bilip otyrmyn. Osyǵan baılanysty men Ishki ister mınıstrligi men Bas prokýratýraǵa arnaıy tapsyrma berdim. «Shash al dese, bas alatyn» áreketterge jol berýge bolmaıdy. Qoǵamdyq komıssııalar óz jumysyna kirisip ketti. Adam quqyqtary jónindegi ýákil Elvıra Ázimova, belgili quqyq qorǵaýshylar: Aıman Omarova, Jemis Turmaǵambetova, Abzal Quspan jáne basqa da zańgerler jınalyp, arnaıy komıssııalar qurdy. Olar ár istiń zańdylyǵyn qarap jatyr. Qoǵamdyq komıssııalarǵa senimsizdik kórsetýge eshqandaı sebep te, haqymyz da joq. Bılik te, quqyq qorǵaý organdary da jumystaryna aralaspaıdy. Men de aralaspaımyn», dedi Prezıdent.
Sondaı-aq Prezıdent quqyq buzýshylyq derekteri jazasyz qalmaıtynyn da sóz etti.
«Árbir quqyq buzýshylyq deregi boıynsha sharalar qabyldanady. Kináli adamdar jazaǵa tartylady. Men úshin azamattarymyzdyń quqyǵy asa mańyzdy. Ásirese, qazirgi tańda muny eń mańyzdy másele dep aıtýǵa bolady. Árbir is boıynsha ádil sheshim shyǵarý men úshin negizgi prınsıp bolyp tabylady», dedi Prezıdent máseleniń mánisine tereńirek úńilip.