Prezıdent «Árbir azamat elimizdiń patrıoty bolýǵa tıis» atty suhbatynda qasiretti qańtar oqıǵasyndaǵy buzaqylardyń áreketine de jan-jaqty toqtaldy, dep habarlaıdy Egemen.kz.
Memleket basshysy óz sózinde birqatar azamattardyń jazyqsyz jandardy qamaýǵa aldy degen pikirmen ǵana júrgenin tiline tıek etti. Olardyń sol urandy el ishine taratyp, qate kózqaras týyndatýǵa tyrysatynyn da atap ótti.
«Buzaqylar týraly máselege kelsek, keıbir adamdar jazyqsyz azamattardy esh sebepsiz qamaýǵa aldy dep oılaıdy da, osyndaı jalǵan urandardy el ishinde taratady. Biraq, mynany umytpaýymyz kerek, solardyń ishinde lańkester de, qylmyskerler de bar. Qarańyzshy, myńdaǵan adam qalany qıratyp, naǵyz terrorıstik áreketterge bardy. Biraq, qazir bári jaı ǵana beıbit azamattar bolyp shyqty. Buǵan kim senedi? Jalpy, lańkesterdi, qaraqshylardy halyq qaharmandary, batyrlary dep aıtýǵa bolmaıdy. Bul – eshqandaı shyndyqqa kelmeıtin jalǵan ýáj», dedi Qasym-Jomart Toqaev.
Qazaqstan Prezıdenti aqıqatqa kóz jetkizbeı jalǵan sóıleıtinderdiń aıtqanyna ılanýǵa bolmaıtynyn atap ótti. Sondaı-aq árbir isti muqııat zerdeleý qajettigin eskertti.
«Eger biz aqıqatyna kóz jetkizbeı, olardyń aıtqanyna senetin bolsaq, elimizge taǵy bir úlken qaýip tóndiremiz. Bul qaraqshylardy Qazaqstanǵa shaqyrý degen sóz. Sondyqtan atalǵan máselede biz óte saq bolýymyz kerek. Árbir is boıynsha muqııat tergeý júrgizýimiz qajet», dedi Qasym-Jomart Toqaev.