Qazaqstandyq FORTE TRIO memlekettik trıosy Eýropa mádenıetiniń ortalyǵy Berlın fılarmonııasynda óner kórsetti. Bethovenniń skrıpka, vıolonchel jáne orkestrmen fortepıanoǵa arnalǵan ataqty konsertin otandyq ártister Berlın sımfonııalyq orkestrimen birge oryndady.
Eki myńnan asa kórermenge arnalǵan úlken zal lyq toly bolyp, konsert bıletteri nebári eki-aq kúnde satylyp ketken. Berlın fılarmonııasynyń ókilderi málimdegendeı, bul pandemııa bastalǵaly beri alǵashqy tolyq anshlag jınaǵan konsert eken. Keshte kórermenniń orkestrge degen ystyq yqylasy, Bethoven mýzykasynyń tanymaldyǵy men qazaqstandyq mýzykanttardyń ónerine degen qyzyǵýshylyq úılesim tapty.
«Álemdik qaýymdastyq elimizdi qańtardaǵy oqıǵalardyń saldarynan saıası kataklızmder arenasy retinde qabyldaǵany belgili. Biraq FORTE TRIO óz ónerleri arqyly Qazaqstandy mádenıeti joǵary deńgeıde damyǵan, ózindik mýzykalyq dástúrleri qalyptasqan memleket retinde kórsete bildi. Trıonyń ónerin joǵary baǵalaǵan sheteldikter bizdiń ártisterdi konsertten keıin sahnaǵa taǵy 5 ret shaqyrdy», dedi «Qazaqkonsert» dırektorynyń orynbasary Laýra Ahmetova.
О́tken jyldyń jeltoqsan aıynda FORTE TRIO Fransııanyń tórt qalasynda konsert ótkizip, osy eldiń 2021 jylǵy konserttik maýsymyn aıaqtaǵany málim. Endi otandyq mýzykanttar Germanııa eliniń ónersúıer qaýymyn tamsandyryp, kovıdtik shekteýlerden sharshaǵan tyńdarmandarǵa umytylmas jarqyn emosııa syılady.
Qazaqkonsert quramyna kiretin FORTE TRIO ansambli Qazaqstannyń eńbek sińirgen qaıratkeri Tımýr Ýrmancheevtiń kórkemdik jetekshiligimen óner kórsetedi. Ujymnyń maqsaty – qazaqstandyq klassıkalyq mýzykany álemge tanytý.
Al qazaqstandyqtar FORTE TRIO ujymynyń ónerin 2 naýryz kúni «Astana Opera» teatrynda ótetin «Lıýbıte lı vy Bramsa?» atty jańa konsertte tamashalaı alady.