Ulttyq Olımpıada komıteti Qytaı astanasynda ótken qysqy Olımpıada oıyndaryndaǵy qazaqstandyq sportshylardyń nátıjesin jarııalady, dep habarlaıdy Egemen.kz.
Qytaı astanasy Beıjińde XXIV qysqy Olımpıada oıyndary aıaqtaldy. Qazaqstan komandasy sońǵy jarys kúninde shańǵydan áıelder arasyndaǵy marafonǵa qatysty. Al quramanyń Beıjińdegi eń úlken kórsetkishi – 4-oryn.
Beıjiń Olımpıadasynda Qazaqstan atynan 34 sportshy óner kórsetti. Olar jalpy esebi 87 joldama jeńip alǵan bolatyn.
Bizdiń atletter shańǵy jarysy, bıatlon, frıstaıl-mogýl, frıstaıl-akrobatıka, short-trek, konkımen júgirý, taý shańǵysy, shańǵy qossaıysy jáne shańǵymen tuǵyrdan sekirý boıynsha baq synady.
Komanda sapyndaǵy eń úzik kórsetkish short-trekshi Abzal Ájiǵalıevke tıesili. Ol 500 metrge júgirýden A fınalyna shyǵyp, tórtinshi orynǵa taban tiredi. Sondaı-aq, basty fınalda synǵa túsken Ádil Ǵalıahmetov 1500 metrde segizinshi oryn aldy.
Sol sııaqty konkıshi Nadejda Morozova mass-startta fınalǵa joldama alyp, aqtyq synda 14-orynnan kórindi.
Aqmarjan Qalmurzaeva shańǵy akrobatıkasynan irikteý synynda 98.68 upaı jınap, TOP-12 qataryna endi.
Qazaqstan tarıhynda alǵash ret Shyńǵys Rakparov shańǵy qossaıysynan Olımpıadada baq synady.
Sondaı-aq, Beıjiń tórinde jas sportshylarǵa da jol ashyldy. 16 jastaǵy Anastasııa Gorodko, 17 jastaǵy Olesıa Graýr (ekeýi de frıstaıl-akrobatıka), 17 jastaǵy Danıl Vasılev (shańǵymen tuǵyrdan sekirý) jáne 18 jastaǵy Aleksandra Troısaıa (taý shańǵysy) bolashaqta el sportynyń órkendeýine úles qosary sózsiz.
Sońǵy úsh Olımpıadada júlde alyp kelgen Qazaqstan quramasy 2006 jylǵy Týrın oıyndarynan keıin alǵash ret medalsiz qaldy.