Eńbek jáne halyqty áleýmettik qorǵaý mınıstri Serik Shapkenov Úkimettiń kezekti otyrysynda Qazaqstanda múgedektikti anyqtaý prosesi jeńildetiletini týraly aıtty, dep habarlaıdy Egemen.kz.
Shapkenovtyń aıtýynsha, bıyl proaktıvti qyzmetterdi 25 túrge deıin jetkizý josparlanýda. Mınıstr memlekettik qyzmet kórsetý kezinde vedomstvo jeke qyzmetke emes, azamattyń ómirlik jaǵdaıyna súıenetinin atap ótti.
«Múgedektik belgilengen jáne járdemaqy men ońaltýdyń tehnıkalyq quraldaryn alǵan kezde densaýlyǵynan aıyrylǵan azamattarǵa emhana, medısınalyq-áleýmettik saraptama bólimi, Halyqqa qyzmet kórsetý ortalyǵy jáne ákimdik ınstansııalaryna júginýge týra keledi. Memleket basshysy 2021 jyldyń aqpan aıynda NSOD otyrysynda múmkindigi shekteýli jandarǵa barynsha qolaıly jaǵdaı jasaýdy, qaǵazbastylyqty alyp tastaýdy tapsyrdy. Osyǵan baılanysty bizdiń mınıstrlik densaýlyq saqtaý jáne sıfrlyq damý mınıstrlikterimen birlesip, múgedektikti syrttaı anyqtaý boıynsha sharalar qabyldady», dedi QR Eńbek jáne halyqty áleýmettik qorǵaý mınıstri Serik Shapkenov.
Mınıstrdiń aıtýynsha, qazirgi ýaqytta elimizdiń barlyq óńirinde múgedektikti anyqtaý úshin medısınalyq-áleýmettik saraptama júrgizýdiń syrttaı formaty boıynsha pılottyq joba iske qosyldy. Bul rette azamat turǵylyqty jeri boıynsha emhanaǵa ǵana júginedi, qalǵan prosester aqparattyq júıelerdi ıntegrasııalaý arqyly adamnyń qatysýynsyz ótedi.
«2022 jylǵy 23 aqpandaǵy jaǵdaı boıynsha syrttaı formatta 6753 ótinim qaraldy. Jalpy, bıyl biz múgedektigi bar azamattardyń 20%-yn osy tásilmen qamtýdy josparlap otyrmyz. Sonymen qatar múgedektigi bar adamdar úshin 2021 jyldan bastap áleýmettik qyzmetter portaly engizildi. Buǵan deıin bul azamattar qajetti qyzmetter men tehnıkalyq ońaltý quraldaryn alý úshin ákimdikter men Halyqqa qyzmet kórsetý ortalyqtaryna jiberilgen bolatyn. Bul óte yńǵaısyz boldy, olar kóp ýaqyt jumsady, qyzmetter kesh oryndaldy. Portal qyzmet jetkizýshilerin óz betinshe tańdaýǵa múmkindik beredi, al memleket taýardyń nemese qyzmettiń qunyn óteıdi. Osynyń arqasynda keıbir jaǵdaılarda qyzmetterdi alý merzimi alty aıdan eki aptaǵa deıin qysqardy. Nátıjesinde 2021 jyly portal arqyly 371 myńnan astam qyzmet kórsetildi jáne ońaltý baǵdarlamalarynyń oryndalýy 2019 jylǵy 62%-dan 2021 jyly 88%-ǵa deıin ulǵaıdy, al bıyl ońaltý baǵdarlamalarynyń oryndalý deńgeıi 90%-dan asady dep josparlap otyrmyz», dep qosty QR Eńbek mınıstrliginiń basshysy.
Mınıstr búgingi tańda áleýmettik-eńbek salasynda elektrondyq formatta 42 qyzmet túri nemese 45 Memlekettik qyzmettiń 93% usynylatynyn, onyń ishinde 21 qyzmet nemese 43% proaktıvti túrde alynýy múmkin ekenin atap ótti.
2021 jyly barlyǵy 12,6 mln Memlekettik qyzmet kórsetildi, onyń ishinde 9,1 mln nemese 72% elektrondyq túrde kórsetildi. Bul 2020 jylmen salystyrǵanda 12%-ǵa artyq. 2025 jylǵa qaraı barlyq memlekettik qyzmetterdiń 100%-yn elektrondyq formatqa kóshirý josparlanǵan.