Negizinde Amanat partııasy kez kelgen basqa basqarýshy organ sekildi ekonomıkany retteýge aralaspaýy, ekonomıkanyń qalypty jáne turaqty jumys atqarýyn qamtamasyz etýi kerek. Osy baǵytta qandaı da bir qadamdarǵa baryp, reforma júrgizip, túrli táýekelderdi der ýaqytynda ańǵaryp, qajetti sheshimderdi qabyldaǵany jón.
Eger partııa ekonomıkalyq táýekelderdi joıa alsa nemese onyń qaterin tómendete alsa, sonda ǵana qoǵam jáne ekonomıka úshin paıdaly bolmaq. Basqarýshy partııa ekonomıkanyń damý strategııasyn anyqtaıdy. Partııa «bizde qandaı ekonomıka jumys isteıdi», «qalaı qaraı qozǵalyp bara jatyr», «ol qalaı damıdy», «jalpy qalaı damýy kerek» degen suraqtarǵa jaýap beredi. Sodan kelip neshe túrli jospar, baǵdarlama, jobalar jazyla bastaıdy.
Álemde kóbine qos partııaly júıe jaqsy jolǵa qoıylǵan. Máselen, Ulybrıtanııada leıborıster men konservatorlar únemi básekeniń kórigin qyzdyryp jatady. Ekeýiniń baǵdarlamasy, tańdaǵan damý strategııalary eki túrli. Birese bılikke leıborıster keledi, birese konservatorlar úkimetti basqarady. AQSh-ta da sondaı júıe. Demokrattar men respýblıkashyldar el bolashaǵy men memlekettiń bet-beınesin qalaı kóretinin ózderinshe dáleldep, qyzý talas júrgizýden sharshamaıdy. Demokrattar bızneske jaǵdaı jasaýǵa basymdyq berip, olar úshin salyq stavkalaryn tómendetý, saýda jáne keden kedergilerin joıý, túrli preferensııalar usyný boıynsha jumys júrgizedi. Al respýblıkashyldar negizinen áleýmettik baǵytty joǵary qoıady. Kedeılerge kómek kórseteıik, járdemaqyny arttyraıyq, qoǵamdaǵy teńsizdikti joıýymyz kerek degen ustanymdaryn jıi kóteredi. Osy turǵyda olardan úlgi alǵan artyq bolmas edi.
Jyl bastalǵaly Prezıdenttiń birqatar reformaǵa («Samuryq-Qazyna», Qazaqstan Damý banki, olıgarhııaǵa qarsy kúres, t.b. – red) kiristi. Onyń kóbi – ekonomıkalyq turǵydan góri saıası salmaǵy basym problemalar. Dese de ol máseleler ońynan sheshilse, sóz joq ekonomıkaǵa jaǵymdy áser beredi. Prezıdent pen partııa jekelegen toptardyń múddesinen el múddesin qanshalyqty joǵary qoıyp, qanshalyqty batyl qadamdarǵa bara alady degen másele – qazir ýaqyt enshisinde.
Arman BEISEMBAEV,
TICKMILL halyqaralyq brokerlik tobynyń sarapshysy