Arqa tósinde kishilerdiń jasy úlken áıel balasyna qarata «táte» dep ún qatatyny bar. Al aınalańa «Aqtáte» ataný – ekiniń birine buıyra bermeıtin baq. Búginde Aqjarqyn Turǵanbaıqyzy Imanbaevany Shet aýdanynda ózin jaqsy tanyǵan aǵaıyn «Aqtáte» dep ataıdy. Qolyndaǵy qyzmetine qarap emes, boıyndaǵy kisilik qasıetterin qurmet tutyp solaı deıtinine keıipkerdiń ómir jolyna úńile otyryp kóz jetkizdik.
Aqjarqyn Turǵanbaıqyzynyń ómiri kúreske toly. Úsh qyzy – úsh qyzǵaldaǵy jelkildep ósip kele jatqanynda jeke ómirindegi aýyr synaqqa tap boldy. Ol eske tússe, júrekti syzdatyp, kóńilge muń uıalatatyn kezder edi. Áıtse de, jaratylysynan qaısar kelinshek taǵdyrdyń basqa salǵanyn qasqaıyp turyp qarsy alǵan.
«О́tken kúnde belgi joq» degen ras-aý. Sol kezdegi qıynshylyq búginde kórgen tústeı umytylǵan. Qazir Aqjarqyn Turǵanbaıqyzy – atyrapqa aty shyqqan bildeı bir mekemeniń bilikti basshysy, aýdan kóleminde abyroıdyń bıigine eńbegimen kóterilgen isker kelinshek.
О́tken ómir jolyna qarap otyrsa, qyzyqty kúnderdi de, synaqqa toly sátterdi de artqa tastapty. О́zi Qyzylorda qalasynda týyp-ósti. Boı jetip, uıadan ushqannan bergi ómirdi súrý Arqa tósinen buıyrtqan eken. Akademık E.Bóketov atyndaǵy Qaraǵandy memlekettik ýnıversıtetiniń fılologııa fakýltetin támamdap, sol jerde laborant bolyp eki-úsh jyl jumys istedi. Odan keıin ómir joly jas mamandy Jezqazǵandaǵy О́.Baıqońyrov atyndaǵy ýnıversıtetke alyp kelgen edi. Osyndaǵy fılologııa fakýltetinde áýeli oqytýshy, sonan keıin dekannyń orynbasary bolyp jemisti qyzmet etti.
Jyljyp 2004 jyl da jetken. Bul jyl Aqjarqyn úshin taǵdyrsheshti, ómirine túbegeıli betburys ákelgen qutty jyl boldy. Taǵdyrdyń jazýy ǵoı: Boranbaı Jumkın esimdi azamatpen tabysyp, otaý qurdy. Al bul kisi Shet óńirinde jaqsy aty shyqqan, uzaq jyldar aýdanda basshylyq qyzmetter atqarǵan qaıratker tulǵa bolatyn.
«Basqa tússe baspaqshyl» degen, qalanyń qyzyna aýyldyq jerge kelisimen sıyr saýyp, qurt qaınatyp, maı shaıqaýdy meńgerýge týra kelgen. Sóıtip úı sharýashylyǵyna qaraılap, bir jyldaı otyryp qaldy.
Al 2005 jyly aýdan ortalyǵyndaǵy «Shet-Kómek» nesıe seriktestigine maman bolyp jumysqa turdy. Esep-qısapqa qurylǵan, qaǵaz-qujaty kóp kúrdeli jumysty bir kisideı meńgerip áketkeni de ras-tyn.
Arada on shaqty jyl ótkende qatardaǵy mamannan seriktestiktiń basshysyna deıingi deńgeıge kóterildi. Uıymnyń 2017 jyly ótken jalpy jınalysynda Aqjarqyn Turǵanbaıqyzy «Shet-Kómek» nesıe seriktestiginiń basqarma tóraıymy bolyp saılandy.
Iá, «Shet-Kómek» nesıe seriktestiginiń órken jaıyp damýyna serpin bergen sebeptiń birin uıymnyń basshylyǵyna isker kelinshek Aqjarqyn Imanbaevanyń kelýimen baılanystyrýǵa bolady. Mysaly, seriktestik aýyl sharýashylyǵy nysandaryna nesıe berý qarqynyn eki jarym esege kóbeıtip, 2018-2019 jyldary 100-ge tarta sharýa qojalyǵyna 250 mln teńgeniń kóleminde qarjy berýdi qamtamasyz etken. Al búginde «Shet-Kómektiń» 186 qatysýshysy bar. Olarǵa berilgen nesıe-zaımnyń kólemi 1 mlrd 477 977 myń teńgeni quraıdy.
Iá, únemi ósý jolyndaǵy mekeme 2019 jyldyń 1 qańtaryndaǵy málimet boıynsha 52 sharýa qojalyǵyna 505,4 mln teńge nesıe berip, bul kórsetkish jaǵynan Qaraǵandy oblysynda úshinshi orynǵa taban tiredi. Al byltyr «Shet-Kómektiń» reıtıngtik kórsetkishi joǵary «A» tobyna jatqyzylyp, elimiz boıynsha nesıe seriktesteri arasynda top bastaýshylar qataryna endi.
«Bankterdi aýyl turǵyndarynyń kepildik retinde usynatyn mal-múlki asa qyzyqtyra bermeıdi, olarǵa keregi – jyljymaıtyn múlik. Al bizdiń «Shet-Kómek» boryshkerlerdiń mal-múlkin qajetti qujattarmen rásimdep, olardyń naryqtaǵy baǵasyn shyǵaryp, sol boıynsha nesıe alýǵa barlyq múmkindikti jasaıdy», deıdi A.Imanbaeva.
Isker adam úshin aınalasyndaǵy áriptestik qarym-qatynasta júrgen jandardyń pikiri óte mańyzdy. Osy oraıda «Shalqar» sharýa qojalyǵynyń basshysy Shalqar Saǵyndyquly bizdiń keıipkerimiz týrasynda óziniń oıyn bylaısha bildirgen. «Aqjarqyn Turǵanbaıqyzymen jumys isteýdiń ózi – bir baqyt. Istiń qııýyn biledi, adamnyń tilin tabady. Ol kisi aralassa, sheshilmeıtin másele, ilgerilemeıtin is joq», deıdi ol aǵynan jarylyp.
Aqjarqyn Turǵanbaıqyzy degende shaǵyn ujymnyń da shyǵarǵa jany joq. Sebep – belgili. Isker kelinshek qaramaǵyndaǵy árbir qyzmetkerdiń babyn taýyp, balasha mápelep júredi. Osyndaı kisilik súıispenshiliktiń jylýyn sezingen ujym da ózge jurt sııaqty Aqjarqyndy «Aqtáte» dep rııasyz kóńilmen ataıdy.
«Aqjarqyn Turǵanbaıqyzy – adamgershiligi mol, óte keńpeıil jáne ádiletti adam. Iá, jumysqa kelgende talaby qatań da shyǵar. Biraq ujymnyń árbir múshesiniń jaǵdaıyn jasaýǵa, kóńilin tabýǵa kelgende, ol kisideı meıirimdi jandy tabý qıyn», deıdi nesıe seriktestiginiń zańgeri Gúlim Álǵojına.
Búginde Aqjarqyn Turǵanbaıqyzy –eki birdeı nemereniń baqytty ájesi. Úsh qyzy da joǵary bilim alyp, qatarynyń aldy boldy. Qazirgi ýaqytta túrli salada el ıgiligi úshin eńbek etip júr.
«Borekem ekeýmizdiń endigi bar tileýimiz – osy balalardyń amandyǵy», deıdi atyna zaty saı aıaýly ana, adal jar, bilikti basshy Aqjarqyn Turǵanbaıqyzy.
Qaraǵandy oblysy,
Shet aýdany