1 sáýirden bastap 2022 jylǵa eseptelgen zeınetaqy jınaqtarynyń eń tómengi jetkiliktilik shegi kúshine enedi, dep habarlaıdy Egemen.kz.
Eske sala ketsek, Prezıdent Qasym-Jomart Toqaevtyń tapsyrmasyn oryndaý maqsatynda Qazaqstan Respýblıkasy úkimetiniń 2021 jylǵy 13 jeltoqsandaǵy №875 qaýlysymen 2021 jylǵa eseptelgen TJSh qoldaný merzimi 2022 jyldyń 1 sáýirine deıin uzartyldy.
«BJZQ» AQ baspasóz qyzmetiniń jazýynsha, zeınetaqy jınaqtarynyń bir bóligin paıdalaný quqyǵyn iske asyrý úshin salymshy turǵyn úı jaǵdaıyn jaqsartý jáne emdelýge aqy tóleý maqsatynda alýǵa qoljetimdi zeınetaqy jınaqtarynyń bar-joǵyna kóz jetkizýi tıis.
Muny enpf.kz saıty nemese BJZQ mobıldi qosymshasyndaǵy jeke kabınette, sondaı-aq, egov portaly men mobıldi qosymshasynda kórýge bolady.
Odan ári salymshy zeınetaqy jınaqtarynyń bir bóligin paıdalaný týraly sheshim qabyldaǵan jaǵdaıda, ýákiletti operatorlardyń ınternet-resýrsy arqyly aldyn ala ótinish bergeni jón.
Búginde turǵyn úı jaǵdaıyn jaqsartýǵa arnalǵan birjolǵy zeınetaqy tólemderine ótinishter qabyldaıtyn ýákiletti operatorlar: «Otbasy bank» turǵyn úı qurylys jınaq banki» AQ, «Qazaqstan Halyq banki» AQ, «Altyn Bank» AQ, «Bank SentrKredıt» AQ jáne «Bank Frıdom Fınans Qazaqstan» AQ, emdelýge «Otbasy bank» turǵyn úı qurylys jınaq banki» AQ bolyp tabylady.
Ýákiletti operator birjolǵy zeınetaqy tólemin alý týraly ótinishti qaraǵannan keıin 2 jumys kúni ishinde BJZQ-ǵa elektrondyq habarlama jiberedi. BJZQ tarapynan alýǵa qoljetimdi qarajat ýákiletti operatordan elektrondyq habarlama kelip túsken kúngi TJSh eskerile otyryp tekseriledi. BJZQ elektrondyq habarlama kelip túsken kúnnen bastap bes jumys kúni ishinde ýákiletti operatorǵa alýshynyń arnaıy shotyna birjolǵy zeınetaqy tólemin aýdarady.
2022 jylǵa arnalǵan TJSh 2022 jyldyń 1 sáýirinen bastap kúshine enetindikten, BJZQ ýákiletti operatorlardan BJZQ-ǵa 2022 jyldyń 31 naýryzyna (qosa alǵanda) deıin kelip túsken ótinishter boıynsha 2021 jylǵa eseptelgen TJSh shamalaryna sáıkes birjolǵy zeınetaqy tólemderin júrgizetin bolady.
QR «Qazaqstan Respýblıkasynda zeınetaqymen qamsyzdandyrý týraly» Zańynda TJSh – Qazaqstan Respýblıkasynyń Úkimeti bekitken ádistemege sáıkes aıqyndalǵan mindetti zeınetaqy jarnalary jáne (nemese) mindetti kásiptik zeınetaqy jarnalary esebinen qalyptastyrylǵan zeınetaqy jınaqtarynyń eń tómengi mólsheri dep aıqyndalǵan. TJSh aıqyndaý ádistemesi Qazaqstan Respýblıkasy Úkimetiniń 2013 jylǵy 2 qazandaǵy №1042 qaýlysymen (2021 jylǵy 6 qańtardaǵy ózgeristeri men tolyqtyrýlarymen) bekitilgen.
Ádistemege sáıkes, TJSh mólsheri jyl saıyn ár jas úshin esepteledi jáne bolashaq zeınetaqy tólemderi men zeınetaqy jarnalarynyń ósýin (ındekstelýin) eskeredi. Bul rette QR «Respýblıkalyq bıýdjet týraly» Zańyna sáıkes jyl saıyn ındeksteletin eń tómengi jalaqy, eń tómengi zeınetaqy, bazalyq zeınetaqy tóleminiń eń tómengi mólsheri sııaqty áleýmettik kórsetkishter paıdalanylady.
TJSh mólsheri týraly aqparat BJZQ saıtynda jarııalanǵan.