Jyl basynan beri asa qaýipti ınfeksııalar, sirespe, dıfterııa, qyzylsha, polıomıelıt, epıdemııalyq parotıt, kókjótel tárizdi juqpaly aýrýlar deregi tirkelgen joq. О́tken jylmen salystyrǵanda oblys turǵyndary arasynda ishek ınfeksııasynyń boı kótergendigin baıqaýǵa bolady. Mundaı oqıǵa 297 márte oryn alǵan.
Oblystyń bas sanıtarlyq dárigeri Aınagúl Mýsınanyń aıtýyna qaraǵanda, sońǵy bes jylda A gepatıti vırýsymen syrqattaný kórsetkishi birshama tómendegen. 2008 jyldan bastap óńirde 18 jaǵdaı oryn alsa, josparly vaksına egýdiń nátıjesinde 2021 jyly osyndaı juqpaly aýrýǵa ushyraý tirkelmegen. Degenmen Sandyqtaý aýdanynda 14 jasqa deıingi bir balanyń boıynan anyqtalyp otyr. Osy bir derekterdi tarazy basyna tartatuǵyn bolsańyz, el ishinde ekiudaı pikir aıtylyp jatqan vaksınanyń qajettiligi taıǵa tańba basqandaı kórinip tur. Ýaqtyly vaksına alý arqyly A gepatıti vırýsynyń joly kesildi. Jaman tumaýǵa qarsy vaksınany ýaqytynda alý qajettigin, demigip turǵan derttiń aldyn alatyn osyndaı shara ekendigin taǵy bir qaıtalap aıtqymyz keledi.
О́ńirde turǵyndardyń qurt aýrýymen syrqattaný deńgeıi ótken jylmen salystyrǵanda 1,3 paıyzǵa azaıdy. Byltyr týberkýlez dertine baılanysty 305 oqıǵa tirkelgen bolatyn. Tutas kórsetkish kemigenimen, qurt aýrýynyń qutyryp turǵan oshaqtary da bar. Máselen, Aqkól, Egindikól, Birjan sal, Zerendi, Selınograd, Shortandy aýdandary men Stepnogorsk, Kókshetaý qalalarynyń turǵyndary arasynda týberkýlez dertiniń ósýi baıqalady.
О́ńirde jalpaq álemdi jalǵyz tarynyń qaýyzyna syıǵyzǵan jaman tumaýdyń beti qaıtqan syńaıly. Dert juqtyrý deregi seıilgennen keıin oblys jasyl aımaqtyń sanatyna ótti. Áıtse de, toqmeıilsýge, jar astyndaǵy KVI indetiniń qaýpin eskermeýge bolmaıdy. Dál qazir stansıonarlarda júzden astam koronavırýs dertin juqtyrǵan adamdar em-dom qabyldaýda. Sońǵy táýlikte oblysta 7 adamnyń boıyndaǵy indet zerthanalyq jolmen anyqtalǵan. Bas sanıtarlyq dárigerdiń aıtýyna qaraǵanda, medısına qyzmetkerlerine, egde adamdarǵa, múmkindigi shekteýli adamdarǵa «Komırnatı» vaksınasyn qoldana otyryp, koronavırýsqa qarsy revaksınalaý júrgizýge ruqsat etilgen.
Sondaı-aq balalardyń amandyǵy da basty nazarda. 2021-2022 oqý jyldarynda 3 700-den astam oqýshynyń koronavırýs indetine shaldyqqany belgili. Demek bilim oshaqtarynda saqtyq sharalaryn muqııat atqarýǵa kóńil bólgen lázim. Naýryz aıyndaǵy mereke kúnderi «kók» jáne «jasyl» mártebedegi adamdarǵa Ashyq qosymshasy bar mekemelerge baryp, is-sharalarǵa qatysýǵa bolady. О́ńir qyzyl aımaqtyń qatarynda bolǵan kezindegi shekteýler alynyp tastaldy.
Solaı bola tura, saqtyq sharalaryn umytýǵa áste bolmaıdy. Qaýip bulty birjola seıilgen joq.
Aqmola oblysy