QR Parlamenti Májilisiniń kezekten tys plenarlyq otyrysy barysynda QR Premer-Mınıstriniń birinshi orynbasary Roman Sklıar bıylǵy qańtar aıynda Qazaqstanda oryn alǵan oqıǵalardan keıingi qalpyna keltirý jumystarynyń nátıjeleri týraly baıandady, dep habarlaıdy Egemen.kz primeminister.kz-ke silteme jasap.
Qazirgi tańda Úkimet jergilikti atqarýshy organdarmen jáne uıymdarmen birlesip, memlekettik organdardyń nysandaryn qalpyna keltirý jáne tártipsizdikter saldarynan zardap shekken kásipkerlik sýbektilerine keltirilgen zalaldy óteý boıynsha jumys júrgizip jatyr.
Qańtardaǵy oqıǵalar kezinde elimizdiń 8 óńirinde 42 memlekettik organ ǵımaratyna zalal keltirildi. Bul – Almaty, Shymkent qalalary, Almaty, Jambyl, Qyzylorda, Atyraý, Aqtóbe jáne Shyǵys Qazaqstan oblystary.
R. Sklıardyń aıtýynsha, keltirilgen shyǵynnyń jalpy somasy shamamen 30 mlrd teńgeni qurady, onyń ishinde respýblıkalyq bıýdjetten 18 nysandy qalpyna keltirýge 28 mlrd teńge baǵyttaldy.
«Barlyq nysandarǵa tehnıkalyq tekseris júrgizildi, onyń qorytyndysy boıynsha 28 ǵımaratqa aldaǵy jóndeý jumystaryn júrgizý, sondaı-aq 14 ǵımaratqa kúrdeli jóndeý jáne rekonstrýksııalaý jumystarynyń qajettiligi anyqtaldy. Búgingi tańda 21 nysanda jóndeý jumystary aıaqtaldy. Naýryz aıynyń sońyna deıin 5 ǵımaratqa, bıylǵy mamyr jáne maýsym aılarynda qalǵan 2 nysanǵa jóndeý jumystary júrgiziledi», — dedi birinshi vıse-premer.
Sonymen qatar kúrdeli jóndeý men rekonstrýksııalaýdy qajet etetin 14 memlekettik nysanda jumys júrgizilip jatyr. Kestege sáıkes 7 ǵımaratta jumystar naýryz aıynda, 5 nysanda maýsym aıynda aıaqtalady.
«Edáýir keltirilgen zaqymdy eskere otyryp, Almaty qalasy ákimdigi men «Qazaqstan» TRK ǵımaratyn qaıta jańartý jumystary bıylǵy qazan aıynda aıaqtalady dep kútilýde», — dep naqtylady R. Sklıar.
Buǵan qosa, tártipsizdik barysynda 1 630 ShOB sýbektisiniń múlkine shamamen 38,6 mlrd teńgege shyǵyn kelgen.
QR Premer-Mınıstriniń birinshi orynbasarynyń aıtýynsha, Memleket basshysynyń kásipkerlik sýbektilerine keltirilgen zalaldy óteý jónindegi tapsyrmasyn oryndaý aıasynda Tártipsizdikter saldarynan týyndaǵan zardaptardy joıý jónindegi komıssııa quryldy. Komıssııa osy jylǵy 20 qańtarda ShOB sýbektilerine keltirilgen múliktik zııandy óteý tetigin qabyldady.
О́temaqy jergilikti atqarýshy organ janyndaǵy óńirlik komıssııalar kelgen zalal kólemin qujat negizinde rastaǵannan keıin júzege asyrylady. Bul oraıda kásipkerler fıskaldyq derekterge súıene otyryp, jeńildetilgen tártippen 10 mln teńgege deıin ala alady.
«Tólemder Úkimettiń rezervinen, sondaı-aq jeke qorlar esebinen beriledi. Bıylǵy 11 naýryzdaǵy jaǵdaı boıynsha О́ńirlik komıssııalar jalpy somasy 5,3 mlrd teńgege 1630 ótinishtiń 1 192-sin maquldady», — dep habarlady R. Sklıar.
Qalǵan 438 kásipker ótemaqyny baǵalaý rásimderi aıaqtalǵannan keıin alady.