Erdoǵan partııasynyń jeńisi
Túrkııa premer-mınıstri Rejep Taıyp Erdoǵan óziniń Ádilet jáne damý partııasy eldegi ótken jergilikti saılaýlarda jeńiske jetkenin jarııa etti. Buǵan qosa, ol jaqtastaryna qarata aıtqan sózinde qarsylastary óziniń ataǵyna kir keltirip, namysyn aıaqasty etkileri kelgenderi úshin «sazaılaryn tartatynyn» málimdedi. Iаǵnı, úkimet basshysy qarsylastaryn bılikten alastatpaq.
Saılaý bıýlletenderin resmı esepteý áli aıaqtalǵan joq. Degenmen, bıýlletenderdiń 85 paıyzy tekserilgennen keıin Erdoǵan partııasynyń aıqyn basymdyqpen jeńiske jetkeni málim bolyp otyr. Onyń qarsylasy – Halyqtyq-respýblıkalyq partııa ekinshi orynǵa turaqtanatyn syńaıly. Eske sala ketsek, Túrkııadaǵy saılaýaldy naýqany úlken jemqorlyq janjaldar aıasynda ótkeni belgili. Soǵan qaramastan, halyq taǵy da Erdoǵanǵa senim artýda. Ol Túrkııa premer-mınıstri oryntaǵynda 11 jyldan astam ýaqyttan beri otyr.
Ýltraońshyldardyń tabysy
Kósemi prezıdent Fransýa Olland bolyp tabylatyn Fransııanyń Sosıalıstik partııasy elde ótip jatqan mýnısıpaldy saılaýlardyń ekinshi týrynda jeńilis tapty. Sosıalıster shamamen 40,5 paıyz daýys jınaǵan. Kósh basyna «Halyqtyq qozǵalys úshin odaq» partııasynyń lıberal-konservatorlary shyǵyp ketken. Olardy saılaýshylardyń 46 paıyzy qoldap, óz daýystaryn bergen.
Áleýmettik saýaldamalarǵa súıener bolsaq, otstavkaǵa ketýi ytımal ári tanymaldylyǵy jaǵynan eń tómen úkimet músheleri premer-mınıstr Jan-Mark Ero, syrtqy ister mınıstri Loran Fabıýs jáne ishki ister mınıstri Manýel Vals bolyp otyr. Mýnısıpaldy saılaýdaǵy jalpy jeńiliske qaramastan, Parıjde Sosıalıstik partııa ozyp shyqty. Sóıtip, el astanasynda Ann Idalgo jeńiske jetip, Parıj tarıhynda alǵashqy áıel mer atandy. Buǵan deıin ol qazirgi mer Bertran Delanoeniń orynbasary bolǵan edi. Al búginde elde Fransýa Olland reıtınginiń tómendegeni anyq baıqalady.
Qos Koreıa bir-birine oq atty
Keshe Soltústik jáne Ońtústik Koreıa elderi teńiz shekarasy aýdanynda bir-birine artıllerııadan oq jumsady. Buǵan deıin KHDR ońtústik kórshilerin Sary teńizde jattyǵýlar ótkizý nıeti bar ekeninen qulaǵdar etken eken. Ońtústik Koreıa qorǵanys mınıstrligi ókilderiniń sózderine qaraǵanda, soltústikkoreıalyq snarıadtardyń bir bóligi teńiz shekarasynyń ońtústikkoreıalyq jaǵyna qulaǵan.
Sodan keıin Ońtústik Koreıa tarapy artıllerııalyq qarýdan jaýap oq atýǵa sheshim qabyldaǵan. Snarıadtarmen «almasýlar» Ońtústik Koreıanyń Pennendo aralyna jaqyn mańda oryn alǵan. Aralda turǵyndardyń qaýipsiz jerlerge evakýasııasy jarııalansa, zardap shekkender týraly naqty eshteńe aıtylmaıdy. Jyl basynan beri KHDR birqatar zymyrandyq synaqtardy júzege asyrǵany belgili. Naýryz aıynyń sońynda orta qashyqtyqtaǵy eki ballıstıkalyq zymyran ushyryldy. Bul áreket BUU tarapynan jazǵyrylǵan da bolatyn.
Kóz jumǵandar sany 20-dan asty
Vashıngtonda laı kóshkininen qaza tapqandar sany, resmı derek boıynsha, 21 adamǵa jetken. Bul týraly óńirlik jedel qyzmet ókilderine silteme jasaı otyryp habarlandy. Buǵan deıin qaza tapqandar sany 18 adam delinip kelgen bolatyn. Jedel qyzmettegilerdiń sózine qaraǵanda, jaqyn arada qaza tapqandardyń resmı tizimi taǵy 4 adammen tolyǵýy yqtımal.
Oqıǵa bolǵan jerde jumys istep jatqan qutqarýshylar 4 adamnyń máıitin tapqan. Olar saraptamaǵa jiberilipti. Al kóshkin saldarynan iz-túzsiz joǵalyp ketkender qataryn 30 adam tolyqtyryp otyr. Áýelde olardyń sany 170 delingen edi. Biraq keıin munyń tym asyra aıtylǵan san ekeni anyqtaldy. Nóser jańbyr týyndatqan laı kóshkini 22 naýryz kúni Sıetl qalasynyń soltústik-shyǵysynan 88 shaqyrym jerdegi Oso eldi mekeninde oryn alǵan edi.
Mysyrda prezıdent saılaýy ótedi
Egıpettiń ortalyq saılaý komıssııasy aldaǵy prezıdent saılaýynyń resmı kúnin belgiledi. Sóıtip, eldegi eń joǵary laýazymǵa saılaý 2014 jyldyń 26 jáne 27 mamyrynda ótetin boldy. Qajet bolǵan jaǵdaıda saılaýdyń ekinshi kezeńi 16 jáne 17 maýsymda ótkizilmek. Al daýys berýlerdiń qorytyndysy saılaý ótken soń 10 kúnnen keshiktirilmeı resmı túrde jarııa etilýi tıis.
Úmitkerlerdi tirkeý úderisi keshe bastalyp ketti jáne ol 20 sáýirge deıin jalǵasady. Saılaý naýqany resmı túrde 3 naýryzda bastalsa, saılaýǵa úsh kún qalǵanda máresine jetetin bolady. Mysyrdyń burynǵy prezıdenti Mohammed Mýrsı taǵynan ótken jylǵy shilde aıynyń basynda eldegi jappaı narazylyq sherýlerinen soń taıdyrylǵan edi. Al ol sol oqıǵadan bir jyl buryn el tarıhynda búkil halyq bolyp saılaǵan alǵashqy memleket basshysy bolǵan-tyn. Búginde Mýrsı birneshe bap boıynsha qylmysty dep tanylyp otyr. Adlı Mansur qazirgi kezde Mysyrdyń ýaqytsha prezıdenti bolyp tabylady.
Para aldy dep aıyptalyp otyr
Sot Izraıldiń burynǵy premer-mınıstri Ehýd Olmertke Holyland qurylys kompanııasynyń isi boıynsha jemqorlyqqa boı aldyrdy dep kiná taqty. Bul is boıynsha taǵy da 9 adam aıyptalyp otyr. Olardyń ishinde Olmerttiń burynǵy keńesshisi Shýla Zaken, Ierýsalımniń burynǵy meri Ýrı Lýpolıanskıı jáne basqalar bar. Taǵy úsh adam aqtap alynypty.
Tergeý málimdep otyrǵanyndaı, Olmert Ierýsalım meri bolyp turǵan kezinde qurylys jobalaryn qoldaǵany úshin para alyp kelipti. Biraq burynǵy premer-mınıstr óziniń kinásizdigin aıtyp, aqtalýda kórinedi. Jalpy, atalǵan qurylys kompanııasyna qatysty bul is Izraıl tarıhyndaǵy asa iri jemqorlyq janjaldardyń biri bolyp otyr. Jáne de bul jemqorlyqqa boı aldyrdy degen turǵydaǵy Olmertke qatysty alǵashqy is emes. 2008 jyly ol jemqorlyq janjalǵa baılanysty úkimet basshysy laýazymymen qoshtasýǵa májbúr bolǵan edi.
Qysqa qaıyryp aıtqanda:
Pákistan soty eldiń burynǵy prezıdenti Pervez Mýsharrafty memleketke satqyndyq jasady dep aıyptady. Ol 2007 jyly, ıaǵnı prezıdent bolyp turǵan kezinde el aýmaǵynda tótenshe jaǵdaılar engizip, óziniń ókilettiligin aıtarlyqtaı arttyrǵan bolatyn. Oǵan osy áreketi aıyp bolyp taǵylyp otyr. Endi Mýsharraf, el zańnamasyna sáıkes, ólim nemese ómirbaqı túrmede otyrý jazasyna kesilýi tıis. Ol Pákistandy 1999-2008 jyldar aralyǵynda basqarǵan bolatyn.
Reseılik kásipker Mıhaıl Hodorkovskıı Shveısarııada turýǵa resmı ruqsat aldy. Ruqsat qaǵazy 27 naýryzda berilgen. Ol Sankt-Gallen kantonynda turýdy qalapty. О́ıtkeni, zaıyby men balalary sonda turyp jatyr eken. Sonymen qatar, atalǵan kantonda salyq rejimi ońtaıly kórinedi. Kásipker Eýropaǵa túrmeden shyǵarylysymen jedel ushyp ketken bolatyn. Endi ol Reseıge oralǵysy joq ekenin de málimdep úlgeripti. Hodorkovskııdiń eki qylmystyq is boıynsha kináli dep tanylyp, 10 jyl túrmede otyryp shyqqany belgili.
Internet materıaldary negizinde ázirlendi.