«Astana Opera» teatrynyń jetekshi solısi, Qazaqstannyń eńbek sińirgen qaıratkeri Baqtııar Adamjan men teatr solısi Anastasııa Zaklınskaıa «Andrıs Lıepa 6:0» álem balet juldyzdarynyń mereıtoılyq gala-konsertinde óner kórsetti. Baqtııar Adamjannyń gastroldik týry Novosibir opera jáne balet teatrynyń sahnasynda qoıylymdarǵa qatysýymen jalǵasty.
Reseıdiń halyq ártisi Andrıs Lıepanyń mereıtoılyq keshi «Qoltańbalar men tulǵalar» atty tanymal joba aıasynda Memlekettik Kreml saraıynda ótken edi. Máskeý sahnasynda «Astana Operany» ǵana emes, kúlli qazaq ónerin tanytqan qos ónerpaz N.A.Rımskıı-Korsakovtyń mýzykasyna Andrıs Lıepa qoıǵan «Sheherazada» baletinen adajıoda Altyn qul men Zobeıdanyń beınelerin somdady.
Sondaı-aq jetekshi solıst osy baǵdarlama aıasynda A.Adannyń «Korsar» baletinen padedeni de oryndady.
Aıta keteıik, Baqtııar Adamjan men Anastasııa Zaklınskaıa «Sheherazadany» qoıylym teatr repertýaryna engen alǵashqy kúnnen beri oryndap keledi.
Baqtııar Adamjan Novosibir opera jáne balet teatrynda shaqyrylǵan jetekshi solıst bolyp eńbek etedi. Kórermender ony A.Hachatýrıannyń «Spartak», L.Mınkýstyń «Don Kıhot» spektaklderi jáne «Baıaderka» baletiniń klassıkalyq nusqasynda jaqsy tanydy.
«Bul joly Morıs Jarrdyń mýzykasyna Rolan Petıdiń «Parıj Qudaı anasynyń soborynda», sondaı-aq ıspandyq horeograf Nacho Dýatonyń qoıylymynda «Baıaderka» baletiniń men úshin jańa nusqasynda bıledim. Túrli sahnalarda, álemdik balet juldyzdarymen birge gala-konsertterde óner kórsetýge múmkindigim baryn maqtan etemin. Ataqty bıshilermen tanystym, shyǵarmashylyq ósýge, tájirıbe almasýǵa úlken áser aldym», deıdi ártis.