Mıkroqarjy naryǵy jandana tústi

Mıkroqarjylyq uıymdar qaýymdastyǵynyń basshysy Erbol Omarhanov elimizde klıentterdi tıimsiz qarjylyq qyzmetterden qorǵaýǵa jáne MQU-ny klıentterdiń quqyqtaryn qorǵaýǵa baǵdarlaýǵa arnalǵan naqty standarttar keshenin engizý qajet dep sanaıdy. Onyń aıtýynsha, mıkroqarjylyq qyzmetti júzege asyratyn uıymdarǵa zańdy sertıfıkat berý klıentter quqyǵyn qorǵaýǵa múmkindik bermek. Odan keıingi mańyzdy másele – etıkalyq minez-qulyq standarttaryn ázirleý jáne engizý.

– Bank jáne saqtandyrý sektorymen salystyrǵanda bizde qaryz alýshylardyń quqyǵyn qorǵaýmen aınalysatyn ýákiletti ombýdsmen joq. Qazir klıentter máselesin aıtyp Qarjy naryǵyn retteý jáne damytý agenttigine shaǵynady, onyń shaǵymyn qaraýǵa 3-14 kún aralyǵynda ýaqyt ketedi. Bul klıent úshin óte uzaq ýaqyt. Al mıkroqarjy ombýdsmeni qarjylyq retteýshige jiberilgen MQU-ǵa qatysty ótinishter men shaǵymdardyń búkil aǵynyn óz baqylaýyna alý arqyly klıentterdiń shaǵymdaryn jedel qaraı alar edi, – dedi E.Omarhanov.

Sondaı-aq ol túıtkildi jaǵdaılardy sheshý jáne klıentterdi oqytý, qoldaý maqsatynda qor qurý kerek degen de usynysyn aıtady. «MQU-ǵa shaǵym kóp bolǵan saıyn onyń qorǵa túsiretin aqshasy da kóbeıedi. Qor qarjysy klıentterdi oqytýǵa, qarjylyq saýattylyqty arttyrýǵa jumsalady», deıdi qaýymdastyq basshysy.

Birinshi nesıe bıýrosynyń málimeti boıynsha, 2022 jyldyń 1 qańtarynda MQU-lardyń zaım portfeli 811,1 mlrd teńgeni quraǵan.

– MQU-ǵa qatysty shaǵymdardyń azdyǵyna súıene otyryp, mıkronesıe naryǵy áleýmettik shıelenistiń negizgi kózi emes dep te boljaýǵa bolady. Sonymen qatar MQU klıentter depozıtin saqtamaıdy, shot ashpaıdy, aýdarym operasııalaryn júrgizbeıdi, qarjy júıesiniń turaqtylyǵy úshin táýekelderdi kótermeıdi. MQU nesıe portfeliniń qurylymynda 50 paıyzdan astamy – jeke tulǵalarǵa jáne ShOB sýbektilerine kásipkerlik maqsattarǵa berilgen shaǵyn nesıe­ler. MQU mindeti – banktik qarjylandyrýǵa múmkindigi joq jeke tulǵalardy nesıeleýge suranysty barynsha qanaǵattandyrý, – dep atap ótti E.Omarhanov.