TECHNO CUP VI! atty respýblıkalyq pikirsaıys týrnıri máresine jetti. Jeńimpazdar 2 mln teńgeden aldy. Iá, bul – áli mektepti bitirmegen balalar úshin ájeptáýir yntalandyratyn syıaqy. Biraq budan da úlken olja – olardyń ýnıversıtet grantyn jeńip alǵany. Saıysqa 100-den asa mektep oqýshysynan bólek joǵary oqý oryndarynyń stýdentteri de qatysty.
7-11-synyp oqýshylary men JOO stýdentteri arasynda TECHNO CUP VI! atty respýblıkalyq pikirsaıys týrnıri ótti. Oǵan irikteý kezeńinen ótken 400 pikirsaıysshy qatysty. Olardyń arasynda elimizdiń ár óńirinen jáne respýblıkalyq mańyzy bar qalalardan kelgen 128 mektep oqýshysy bar.
Týrnırdiń qorytyndysy boıynsha, Mektep lıgasynda Aqtóbe qalasyndaǵy M.Qurmanǵalıeva atyndaǵy mektep-gımnazııanyń oqýshylary Álisher Qýanysh pen Aqyljan Iteǵulov jeńimpaz atandy. Olar Sátbaev ýnıversıtetiniń bilim grantyn utyp aldy. Álisher qazir 10-synypta, Aqyljan 11-synypta oqıdy.
Jeńimpaz Aqyljan Iteǵulov: «Biz mekteptegi pikirsaıys úıirmesine eki jyldan asa ýaqyt qatysamyz. Pikirsaıys jarystary bizge unaıdy. О́ıtkeni onda sheshendik ónerdi, sheberlikti shyńdaısyń, halyq aldynda sóıleýdi, synı turǵydan oılaýdy úırenesiń. Sonymen qatar oı órisiń men erýdısııa daǵdylaryńdy damytasyń. Pikirsaıys týrnıriniń jeńimpazy atanyp, Sátbaev ýnıversıtetiniń bilim grantyn jeńip alǵanyma óte qýanyshtymyn», dedi.
Qazaq jáne orys lıgalarynyń jeńimpazdary, sondaı-aq týrnırdiń úzdik spıkerleri jalpy somasy 2 mln teńgeden asa aqshalaı syılyq aldy. Týrnırde «Úzdik tóreshi» nomınasııasynyń ıegeri de anyqtaldy, atalǵan nomınasııa boıynsha Halyqaralyq aqparattyq tehnologııalar ýnıversıtetiniń stýdenti Ýlıana Vılemson jeńimpaz atandy.
Aıta keteıik, týrnır amerıkalyq, brıtandyq parlamenttik pikirsaıys formattarynyń erejeleri jáne Lınkoln-Dýglas erejeleri boıynsha ótti. Fınaldyq oıynnyń qorytyndysy boıynsha Radıoelektronıka jáne baılanys áskerı-ınjenerlik ınstıtýtynyń «Patrıot» pikirsaıys klýby úzdik delegasııa boldy.