Abaı, Ulytaý jáne Jetisý oblystaryn qurý atalǵan óńirlerdiń áleýmettik-ekonomıkalyq damýyn jańa deńgeıge kóterýge múmkindik beredi. Bul týraly QR Premer-Mınıstri málimdedi, dep habarlaıdy Egemen.kz.
«Joldaýdyń negizgi basymdyqtarynyń biri – óńirlerdiń damýyna jańa serpin berý. Abaı, Ulytaý jáne Jetisý oblystarynyń qurylýy atalǵan óńirlerdiń áleýmettik-ekonomıkalyq damýyn jańa deńgeıge kóterýge jáne jergilikti halyqtyń problemalaryn jedel sheshýge múmkindik beredi», dedi Álıhan Smaıylov Úkimet otyrysynda.
Bul rette Úkimet aldynda Memleket basshysynyń tapsyrmasyn nátıjeli júzege asyrý mindeti turǵanyn da aıtty.
«Ol úshin óńirlerdi qarjylandyrý tártibin túbegeıli qaıta qarap, bıýdjetaralyq qatynastardyń ońtaıly modelin ázirleý qajet», dep atap ótti Úkimet basshysy.
Premer-Mınıstrdiń aıtýynsha, óńirler úshin memlekettik satyp alý tártibin jeńildetý máselelerin pysyqtaý qajet.
«Jańa oblystardy qalyptastyrý boıynsha jedel jumysty uıymdastyrý úshin Ulttyq ekonomıka mınıstrligine múddeli memlekettik organdarmen birlesip, bir apta merzimde tıisti jol kartasynyń jobasyn engizýdi tapsyramyn», dedi Á.Smaıylov.