Pavlodar qalasynda bes qabatty úıden órt shyqqan. Jumysqa jedel kirisken sala qyzmetkerleri 37 jasar azamatty qyzyl jalyn ortasynan alyp shyǵyp, jedel járdem ókilderine tabystaǵan, dep habarlaıdy Egemen.kz oblystyq TJD baspasóz qyzmetine silteme jasap.
Tilsiz jaý ortasynan aman shyqqan azamat búginde jansaqtaý bólimine túsken. Budan bólek órt sóndirýshiler birneshe azamat pen eki balany balkon arqyly qutqarǵan. TJD keltirgen derekterge zer salsaq, órt 19 naýryz kúni saǵat 23.00 shamasynda tutanǵan. Ekinshi qabatta ornalasqan páterlerdiń birinde turmystyq zattar men jıhazdar órtengen.
«№3 órt sóndirý beketiniń qyzmetkerleri Erǵalı Kárimjanov, Damır Qabylbek, Áset Áýbákirov jáne Oleg Lopatenko jumysyna adaldyq tanytyp, páter ıesin aman alyp qaldy. Olar jábirlenýshini kireberis esikten alyp shyqqan», delingen baspasóz qyzmetiniń habarlamasynda.