Memleket basshysy Qasym-Jomart Kemelulynyń ústimizdegi jyldyń 16 naýryzyndaǵy Joldaýy Jańa Qazaqstannyń jańa tarıhyndaǵy halqymyzdyń rýhyn asqaqtatyp, eldik týyn kókke kótergen erekshe Joldaý boldy. Joldaýdyń ár tarmaǵy, árbir joly taratyp aıtar jasampazdyq baǵdarǵa, úmit pen maqsatqa toly.
Jurtshylyqty jaqsylyqqa jumyldyrǵan sondaı usynys pen sheshimderdiń shoqtyǵy bıikteri – elimizdiń keń baıtaq jerinde jańa ákimshilik óńirlerdiń, atap aıtqanda Abaı, Ulytaý, Jetisý oblystarynyń shańyraq kóterýi – sóz joq, erekshe tarıhı oqıǵa boldy der edim.
Sondaı-aq bolashaq Almaty oblysynyń ortalyǵy Qapshaǵaı qalasy ultymyzdyń ardaqty perzenti Dinmuhamed Ahmetuly Qonaevtyń atymen atalyp, Almaty qalasy baryn eskerip, jańarǵan oblysqa Qonaev esimi berilse da artyq emes.
Dinmuhamed Ahmetuly óz zamanynda ótken ǵasyrdyń 1936 jyly ol kezde qazaq balasynyń qoly jete bermeıtin Máskeýdegi tústi metall jáne altyn ınstıtýtyn bitirip, Balqashtaǵy Qońyrat rýdnıginde eńbek jolyn ken qazatyn mashınanyń mashınıst-mehanıgi, masterinen bastap, Shyǵys Qazaqstan oblysynyń Rıdder qalasynda iri ken basqarmasynyń óndiris basshysy boldy. Uzaq jyldar respýblıka Úkimeti basshylyǵynda, Qazaq KSR-y Ǵylym Akademııasynyń prezıdenti, Qazaqstan Kompartııasy Ortalyq Komıtetiniń birinshi hatshysy, KOKP Ortalyq komıteti Saıası bıýrosynyń múshesi qyzmetterin el múddesinde zor abyroımen atqardy. Dımekeńniń tusynda bizdiń respýblıkamyzda ónerkásip keshenderi keńinen qanat jaıyp, agrarlyq sala órkendedi. Egis dalalary men mal sharýashylyǵynda 2 myńnan astam sovhoz ben 5 júzge jýyq kolhoz jumys istep, eldi azyq-túlikpen qamtamasyz etýge úlesterin qosty. Qapshaǵaı, Temirtaý, Rýdnyı, Stepnogorsk, Rıdder, Hromtaý, Balqash, Qarataý, Kentaý, Ashysaı, Tekeli, Aqsý (Ermak), Aqtaý (Shevchenko), Ekibastuz sııaqty san salaly ónerkásip qalalary tikeleı Dinmuhamed Ahmetulynyń bastamashylyǵymen, qamqorlyǵymen boı kóterdi. Halyqtyń áleýmettik turmysy jaqsardy. Respýblıkamyzda árbir azamattyń mindetti orta bilim alýy, tegin densaýlyq saqtaý júıesi jolǵa qoıyldy. 30-shy jyldardaǵy saıası qýǵyn-súrgin zardaptarynan 60-jyldardyń «jylymyǵy» kezeńinde joǵary oqý oryndaryna, ǵylymı ınstıtýttarǵa jol ashylyp, ǵylym óristep, órkendedi. О́ner, mádenıet, ádebıet jańa tynys alyp, talantty býyn ókilderiniń shyǵarmalary jaryq kóre bastady. Ol dáýir de halqymyzdyń tarıhynyń ótken jyldary men joldary.
Prezıdent óz Joldaýynda da, odan burynǵy sózderinde de búgingi jańa kezeńge bet alyp turǵanda osynyń aldyndaǵy memlekettik táýelsizdigimizdiń jetken jetistikterin saqtaı, baǵalaı bilý mańyzdylyǵyna da aıryqsha nazar aýdaryp keledi. Bul óte oryndy ári bolashaqqa qajet dúnıetanym.
Saıasattyń, el basqarý isiniń qarama-qaıshylyqqa toly ustaranyń júzindeı qylpyldaǵan qyl kópirimen ótý de kez kelgen pendeniń basyna berile bermeıtin ári baq, ári synaq. El basqarǵan qyzmettiń, eńbektiń tutas elge jaǵýy da múmkin emes. Bireý jaqtyrǵan sheshim ekinshi bireýge jaqpaı jatýy da tabıǵı. Alaıda barlyq is-áreket tek adaldyqpen, meılinshe ádildikpen atqarylýǵa tıis. Halyq ıgiligine adal eńbek etken arda perzentimizdiń biregeıi Dinmuhamed Ahmetuly Qonaev.
Qasym-Jomart Kemeluly úlken parasattylyqpen Qonaevqa qurmet kórsetý arqyly tarıhymyzdyń aldyńǵy býyn zamanyna, respýblıkamyzdyń ósý joldaryna qurmet kórsetip otyr.
Qýanysh SULTANOV,
Qazaqstannyń eńbek sińirgen qaıratkeri