Shymkenttegi Keńes Odaǵynyń Batyry Sabyr Rahımov atyndaǵy respýblıkalyq «Jas ulan» mektebiniń saptyq alańynda jas patrıottardyń birinshi qysqy spartakıadasynyń jeńimpazdary marapattaldy, dep habarlaıdy Egemen.kz.
Mektep basshysy, polkovnık Ǵazız Tóleýshev quttyqtaý sózinde jasóspirimderdiń dene shynyqtyrý baǵytyndaǵy daıyndyǵynyń mańyzdylyǵyn atap ótti.
«Sportpen shuǵyldanýdyń Qarýly Kúshter qataryndaǵylardyń bolashaq qyzmetine tıgizer paıdasy kóp. Jeńiske jetý jolynda birqatar qıyn synaqtardan ótip, kóptegen daǵdylardy kórsetý kerek bolady. Bizdiń ulandar sol synaqty keremet oryndady», dedi mektep basshysy.
Áskerı mekteptiń tárbıelenýshisi Asylanbek Ernur osynaý jarysqa qatysyp, úzdik nátıje kórsetti.
«Men jarystyń barlyq kezeńine qatystym. Synaqtan sátti ótýge sportqa degen mahabbatym kómektesti. Mektepte sabaqtan bos ýaqytta jeńil atletıkamen aınalysamyn, fýtbol men voleıbol oınaımyn. Mektepti bitirgennen keıin áskerı ınstıtýtqa túsip armııada qyzmetimdi jalǵastyramyn», dep bolashaq josparymen bólisti Asylanbek Ernur.
Qarýly Kúshterdiń 30 jyldyǵyna arnalǵan jarysqa elimizdiń barlyq óńirlerinen «Jas sarbaz» áskerı patrıottyq qozǵalysynyń jáne «Jas ulan» respýblıkalyq mektepteriniń 80 tárbıelenýshisi qatysty. Oqý oryndary arasyndaǵy komandalyq saıysta Shymkent qalasynyń ulandary úzdik atandy.
Jarys Shoqan Ýálıhanov atyndaǵy áskerı kolledj jáne Qorǵanys mınıstrligi ortalyq sport klýbynyń oqý-jattyǵý ortalyǵynda ótkizildi. Tórt kún boıy jasóspirimder pnevmatıkalyq vıntovkadan atý, beltemirge tartylý, shańǵy jarysy jáne áskerılendirilgen estafetadan saıysqa tústi.